مادەنيەت جانە اقپارات مينيسترلىگى مەن «ۇلتتىق كينونى قولداۋ مەملەكەتتىك ورتالىعى» بىرلەسە ۇيىمداستىرعان اۋقىمدى رەسپۋبليكالىق «JARQYRA» كاستينگى ءوتتى. جوبا بۇكىل ەلدى قامتىدى. كاستينگ ەلىمىزدىڭ 19 قالاسىندا ءبىر مەزەتتە ءوتىپ, وتاندىق كينەماتوگرافيا تاريحىنداعى ەڭ ءىرى شارالاردىڭ بىرىنە اينالدى, دەپ حابارلايدى Egemen.kz.
ساعات 11:00-دەن 19:00-گە دەيىن مادەنيەت وشاقتارىندا وتكەن ىرىكتەۋگە 1 000-نان استام ادام قاتىسىپ, ۇلتتىق كينونىڭ ءبىر بولىگى بولۋعا نيەت ءبىلدىردى. قاتىسۋشىلاردىڭ قاتارىندا وبلىس ورتالىقتارىنان بولەك, اۋدان-اۋىلدان كەلگەن تۇرعىندار دا بار. بۇل ازاماتتاردىڭ كينو ونەرىنە دەگەن ىقىلاسىن, جوعارى دەڭگەيدەگى قىزىعۋشىلىعىن جانە دە شىعارماشىلىق سالادا وزدەرىن سىناپ كورۋگە دەگەن ۇمتىلىسىن اڭعارتادى.
قاتىسۋشىلاردىڭ انكەتالارى ساراپتاما كەڭەسى تاراپىنان مۇقيات زەردەلەندى. باعالاۋ كەزىندە اكتەرلىك قابىلەت, ساحنالىق وبرازدى بەينەلەۋ شەبەرلىگى جانە كاسىبي دامۋعا دەگەن الەۋەت ەسكەرىلدى. كاستينگ قورىتىندىسى بويىنشا 705 قاتىسۋشى كينو ورتالىقتىڭ اكتەرلىك بازاسىنا ەنگىزىلدى.
«JARQYRA» كاستينگى ەلىمىزدە قۋاتتى شىعارماشىلىق الەۋەتتىڭ بار ەكەنىن جانە ءتۇرلى بۋىن وكىلدەرىنىڭ كينو سالاسىندا كاسىبي جۇمىس ىستەۋگە دايىن ەكەنىن كورسەتتى. ءار قاتىسۋشىنىڭ شىعارماشىلىق كوزقاراسى, ءتارتىبى مەن شىنايى ىنتاسى قۋانتادى. ىرىكتەۋ وڭاي بولعان جوق. ساراپتاما كەڭەسىنىڭ الدىندا كوپتەگەن دارىندى ۇمىتكەردىڭ اراسىنان ۇزدىكتەرىن تاڭداۋ مىندەتى تۇردى. ۇلتتىق كينونى قولداۋ مەملەكەتتىك ورتالىعى وتاندىق كينويندۋستريانى دامىتۋ, جاڭا ەسىمدەردى اشۋ جانە ولاردىڭ كاسىبي وسۋىنە جاعداي جاساۋ باعىتىنداعى جۇيەلى جۇمىستارىن جالعاستىرا بەرەدى», دەيدى «ۇلتتىق كينونى قولداۋ مەملەكەتتىك ورتالىعىنىڭ» باسقارما توراعاسى قۇرمانبەك جۇماعالي.
ايتا كەتەيىك, كاستينگتەن وتكەن قاتىسۋشىلاردىڭ انكەتالارى كينو ورتالىعىنىڭ رەسمي سايتىنا ورنالاستىرىلادى. ونلاين اكتەرلىك بازا پروديۋسەرلەر مەن كينوكومپانيالارعا جاڭا ەسىمدەردى اشۋعا, دارىندى اكتەرلەردى تابۋعا جانە بولاشاق فيلمدەرگە شىعارماشىلىق توپتار قۇرۋعا مۇمكىندىك بەرەتىن زاماناۋي قۇرالعا اينالماق.