بۇگىن ۇكىمەت وتىرىسىندا بيىلعى ەگىن جيناۋ جۇمىستارى قورىتىندىلاندى. اۋىل شارۋاشىلىعى ءمينيسترى ايداربەك ءساپاروۆ داندى جانە باسقا دا اۋىل شارۋاشىلىعى داقىلدارىنان رەكوردتىق ءونىم جينالعانىن ءمالىم ەتتى, دەپ جازادى Egemen.kz.
16 ملن گەكتار القاپتان گەكتارىنا 17 تسەنتنەر ورتاشا ونىمدىلىكپەن 27 ملن توننا استىق قامباعا قۇيىلعان. 12,2 ملن گەكتاردان بيداي جينالىپ, 20,3 ملن توننا بيداي باستىرىلعان. بۇل كورسەتكىش بىلتىرعىدان جارتى ميلليون تونناعا كوپ. سونداي-اق 4 ميلليون توننا ارپا جينالسا, بۇرشاق داقىلدارىنىڭ ءونىمى العاش رەت 1 ميلليون تونناعا جەتكەن. مايلى داقىلدار بويىنشا بۇگىنگى كۇننىڭ وزىندە رەكوردتىق 4,3 ملن توننا جينالعان. ايداربەك ساپاروۆ ونى جيىپ-تەرۋ بويىنشا جۇمىستار ءالى دە جالعاسىپ جاتقانىن اتاپ ءوتتى.
«بيىل تەك ءداندى داقىلدار بويىنشا عانا ەمەس, سونىمەن قاتار بۇرشاقتى جانە مايلى داقىلدار سياقتى جوعارى رەنتابەلدى ءارى سۇرانىسقا يە داقىلدار تۇرعىسىنان دا رەكوردتىق جىل بولدى. بۇل داقىلدارعا ەگىس القاپتارىن ءارتاراپتاندىرۋ شەڭبەرىندە ەرەكشە نازار اۋدارىلدى», دەدى ايداربەك ساپاروۆ. كوكونىستەردى جيناۋ ءىسى دە مارەسىنە جەتكەن. مينيستر بەرگەن ەسەپكە سۇيەنسەك, 2,9 ملن توننا كارتوپ, 3,8 ملن توننا كوكونىس, 2,6 ملن توننا باقشا داقىلدارى جينالعان. ماقتا تەرۋ ناۋقانى دا اياقتالعان. تامشىلاتىپ سۋارۋدى قولدانۋ ناتيجەسىندە كەيبىر شارۋاشىلىقتار گەكتارىنان 50 تسەنتنەرگە دەيىن ءونىم العان. ماقتانىڭ ورتاشا ونىمدىلىگى 30 تس/گا بولىپ, 428 مىڭ توننا ءشيتتى ماقتا جينالعان. بۇل وتكەن جىلمەن سالىستىرعاندا 42%-عا كوپ.