ليزينگ پەن اۆتونەسيەنىڭ ايىرماشىلىعى قانداي؟

بۇعان دەيىن ەلىمىزدە جەڭىل جانە ارنايى كولىكتەر ليزينگپەن زاڭدى وكىلدەرگە عانا بەرىلىپ كەلگەن. ەندى جاڭا ەرەجەلەر جەكە ازاماتتارعا دا قاتىستى بولماق. 

اۆتوليزينگ – كولىكتى ۇزاق مەرزىمدى جالعا الۋ. ليزينگ ارقىلى كولىك اي سايىنعى تولەم نەگىزىندە بەرىلەدى. جالعا الۋ مەرزىمى اياقتالعانعا دەيىن كولىك الۋشىنىڭ ەمەس, ليزينگتىك كومپانيانىڭ مەنشىگى بولىپ قالادى.

جالداۋ مەرزىمى اياقتالعاننان كەيىن تۇتىنۋشى اۆتوكولىكتى كومپانياعا قايتارۋ نەمەسە قالدىق قۇنى بويىنشا ساتىپ الۋ تۋرالى شەشىمدى ءوزى قابىلدايدى. ەركىنە قاراي جاڭا كەلىسىمگە قول قويىپ, باسقا كولىكتى جالعا الۋ تەتىگى دە ۇسىنىلادى.

قازىر ۋاكىلەتتى مەملەكەتتىك ورگاندار باعدارلامانىڭ تەتىگى مەن ونىڭ نەگىزگى شارتتارىن انىقتاۋ ءۇشىن زاڭناماعا وزگەرىستەر ەنگىزۋ باعىتىندا جۇمىس اتقارىپ جاتىر. 29 قازان كۇنى ساۋدا جانە ينتەگراتسيا مينيسترلىگى كولىكتى ليزينگكە الۋعا مۇمكىندىك بەرەتىن ساۋدا ەرەجەلەرىنە ەنگىزىلگەن وزگەرىستەر تۋرالى «اشىق ۇكىمەت» پورتالىندا جاريالادى. دەسە دە جوبادا ليزينگپەن جاڭا اۆتوكولىك الۋ جولدارى مەن ەرەجەلەرى, شارتى ءالى ناقتىلانباعان.

جوبا جەكە تۇلعالارعا كولىكتى پايدالانۋ ءۇشىن ليزينگ شارتى نەگىزىندە ونى كەيىن مەنشىككە ساتىپ الۋ نەمەسە ليزينگ بەرۋشىگە قايتارۋدى ۇسىنعان.

بۇل مەحانيزم ازاماتتار ءۇشىن اۆتوكولىكتەردىڭ قولجەتىمدىلىگىن ارتتىرۋعا, ىشكى اۆتوليزينگ نارىعىن دامىتۋعا جانە باسەكەلەستىك ورتانى نىعايتۋعا ىقپال ەتەدى.

ليزينگتىڭ جەڭىلدەتىلگەن نەسيەدەن نەسى ارتىق؟

ليزينگ پەن اۆتونەسيەنىڭ باستى ايىرماشىلىعى – مەنشىك قۇقىعى. اۆتونەسيە راسىمدەلگەندە كولىك بىردەن ساتىپ الۋشىنىڭ اتىنا تىركەلىپ, بانك كەپىلدىگىندە بولادى. ال ليزينگتە كولىك ساتۋشى كومپانيانىڭ مەنشىگىندە قالادى. ونى راسىمدەۋشى جالعا الۋشى ساناتىندا بولىپ, تولەمدى دە وسى نەگىزدە جاسايدى. 

تولەم قۇرىلىمىندا دا ەرەكشەلىك بار. اۆتونەسيەدە كولىك قۇنى مەن پايىزى اي سايىن تولەنسە, ليزينگتە ايىنا ونىڭ امورتيزاتسيا شىعىندارى وتەلەدى. ليزينگ مەرزىمى بىتكەندە قالدىق سومانى تولەپ, كولىكتى مەنشىگىڭىزگە وتكىزە الاسىز. 

باستاپقى جارنا قۇيۋ جۇيەسىندە دە وزگەشەلىكتەر بار. اۆتونەسيەمەن كولىك الاردا, ادەتتە, 10-30 پايىز باستاپقى جارنا تالاپ ەتىلەدى. ليزينگ جۇيەسىندە تومەنىرەك جارنا تالاپ ەتىلۋى مۇمكىن, كەيدە, ءتىپتى مۇنداي شارت بولمايدى. 

ليزينگپەن كولىك العان ازامات كەلىسىمشارت مەرزىمى بىتكەننەن كەيىن كولىكتى قايتارۋعا نەمەسە وزىندە قالدىرۋعا قۇقىلى. اۆتونەسيە نەگىزىندە كولىك يەلەنگەندەردە م ۇلىك وزىندە قالادى.

ليزينگپەن كولىك تىزگىندەۋدىڭ ءتيىمدى تۇسى قانداي؟

ونەركاسىپ جانە قۇرىلىس مينيسترلىگى قازاقستاندا باستاپقىدا ليزينگكە جاڭا كولىكتەر, كەزەڭ-كەزەڭىمەن پايدالانىلعان كولىكتەردى دە ۇسىنىلۋى مۇمكىن ەكەنىن ەسكەرتىپ وتىر. مۇنداي كولىكتەردىڭ شەكتى باعاسىن بەلگىلەۋ ليزينگتىك كومپانيالاردىڭ قۇزىرەتىنە قالدىرىلادى. ال سالاداعى ساراپشىلار ەلىمىزدە ليزينگ باعدارلاماسى ءساتتى جۇزەگە اسۋ ءۇشىن ليزينگ شارتى, تولەم مولشەرى ادەتتەگى اۆتونەسيەدەن تومەن بولۋى كەرەك ەكەنىن العا تارتىپ وتىر.

«نەسيە بويىنشا ايىنا 100 مىڭ, ليزينگتە 150 مىڭ تولەم جاساۋ شارتى بولسا ونى راسىمدەۋدىڭ قاجەتى قانشا؟ باعدارلاما شىنىندا دا حالىققا جەڭىلدەتىلگەن نۇسقادا ۇسىنىلۋى ءۇشىن ليزينگ بەرەتىن كومپانيا نەمەسە ليزينگتىك باعدارلامانى قارجىلاندىراتىن ەكىنشى دەڭگەيلى بانكتەر بەلگىلى ءبىر سوماداعى قاراجاتتى قازىرگى مولشەرلەمەدەن تومەن الۋى كەرەك. قازىر قايتا قارجىلاندىرۋ مولشەرلەمەسى – 18%. بانك سايكەسىنشە 20% پايىزدىق مولشەرلەمەمەن ۇسىنۋى مۇمكىن. سوندىقتان ليزينگ قالتاعا قونىمدى بولۋ ءۇشىن 20%-دان تومەن بولۋ كەرەك», دەدى قازاقستاننىڭ تاۋەلسىز اۆتوكولىك وداعىنىڭ باسشىسى ەدۋارد ەداكوۆ.

الەمدىك تاجىربيەدە بار ءادىس

جاپونيا جانە اقش سىندى الپاۋىت ەلدەردە جەكە ازاماتتارعا ليزينگتىك تارتىپتە كولىك بەرۋ ءتارتىبى نىق قالىپتاسقان. ماسەلەن اقش ازاماتتارىنىڭ 3/1 تىزگىنىندەگى كولىككە ليزينگ نەگىزىندە قول جەتكىزگەن. ال كۇنشىعىس ەلى ەڭ كوپ ليزينگتىك وپەراتسيالار ورىندالاتىن ەكىنشى مەملەكەت. جاپونياداعى ليزينگ جۇيەسى سالىق جەڭىلدىكتەرىن ءبىر ەلدەن ەكىنشى ەلگە ءتيىمدى اۋداراتىندىعىمەن دە ءتيىمدى. بۇل جۇيە ءوز كەزەگىندە وندىرۋشىگە دە, جالعا الۋشىعا دا قولايلى ەكەنىن اڭعارتىپ وتىر.