استانا قالاسىندا ورتالىق ازيا اريتمولوگيالىق ءسامميتى – جۇرەك ىرعاعىنىڭ بۇزىلۋىن دياگنوستيكالاۋ مەن ەمدەۋدىڭ زاماناۋي تاسىلدەرىنە ارنالعان وڭىرلىك ماڭىزدى مەديتسينالىق شارا ۇيىمداستىرىلدى, دەپ حابارلايدى Egemen.kz دەنساۋلىق ساقتاۋ مينيسترلىگىنە سىلتەمە جاساپ.
فورۋم شۇعىل مەديتسينانى ۇيلەستىرۋدىڭ ۇلتتىق ورتالىعى بازاسىندا ءوتتى جانە ءتۇرلى ەلدەردىڭ جەتەكشى ماماندارىنىڭ تاجىريبە الماسۋىنا ارنالعان الاڭ بولدى. ەكى كۇن بويى قازاقستان, تۇركيا, اۆستريا, كورەيا, قىتاي, پولشا, ازەربايجان, گەرمانيا, ءباا, رەسەي, بەلارۋس, قىرعىزستان جانە وزبەكستان ەلدەرىنىڭ كارديولوگتارى مەن اريتمولوگتارى اريتمولوگيا سالاسىنداعى وزەكتى باعىتتاردى تالقىلادى.
«باستى تاقىرىپتاردىڭ قاتارىندا – قازاقستانداعى جۇرەكشەلەر فيبريللياتسياسىن ابلاتسيالاۋ تاجىريبەسى, كاتەتەرلىك ەمدەۋ ادىستەرىن سالىستىرۋ, ەرەسەكتەردەگى جۇرەك اقاۋلارىمەن بايلانىستى اريتميالار, كەنەتتەن بولاتىن جۇرەك ءولىمىنىڭ الدىن الۋ, سونداي-اق كارديوۆەرتەر-دەفيبريللياتورلاردى جانە فيزيولوگيالىق كارديوستيمۋلياتورلاردى يمپلانتاتسيالاۋداعى يننوۆاتسيالار بار», – دەپ حابارلادى مينيسترلىك.
ماماندار جۇرەك ىرعاعى بۇزىلۋىن جوعارى تەحنولوگيالىق ادىستەرمەن ەمدەۋدىڭ جاڭا تاسىلدەرىنە ەرەكشە نازار اۋداردى. ۇيىمداستىرۋشىلاردىڭ ايتۋىنشا, قازاقستاندا اريتمولوگيالىق كومەكتى دامىتۋ قارقىندى ءجۇرىپ جاتىر.
«بيىل مامىر ايىندا شۇعىل مەديتسينانى ۇيلەستىرۋدىڭ ۇلتتىق ورتالىعى قۇرىلىمىندا جۇرەك ىرعاعى ورتالىعى اشىلدى. ول كۇردەلى وپەراتسيالاردى ورىنداۋعا ارنالعان زاماناۋي جابدىقتارمەن تولىق قامتاماسىز ەتىلگەن. مۇندا 3D-ناۆيگاتسيالىق كارتالار جاساۋ, راديوجيىلىك جانە يمپۋلستىك ابلاتسيا, ەلەكترودسىز كارديوستيمۋلياتورلاردى ورناتۋ, سونداي-اق ەندوكارديالدىق ەلەكترودتاردى الۋ سياقتى كۇردەلى پروتسەدۋرالار جاسالادى», – دەپ حابارلادى ۆەدومستۆو.