تايقازان, تورلەت تورىمە!

«قازاقستان حالقى اسسامبلەياسى – 20 يگى ءىس «ەستافەتاسى اياسىندا ۇيىمداستىرىلعان اكتسيا شارالارىنا قىزىلجار ءوڭىرىنىڭ تۇرعىندارى زور قولداۋ كورسەتتى. ەلوردادان باستاۋ العان اكتسيا كەربەز كوكشەتاۋ ءوڭىرىن ارالاپ, ەندى, مىنە, قاسيەتتى قىزىلجار جەرىنە, ماعجان ەلىنە دە كەلىپ جەتتى. «قازاقستان حالقى اسسامبلەياسى – 20 يگى ءىس» رەسپۋبليكالىق ەستافەتانىڭ سيمۆولى – ۇلكەن تاي­قازاننىڭ كىشى كوشىرمەسىن الا كەلگەن اقمولا وبلىسىنىڭ دەلەگاتسياسىن جەرگىلىكتى ەتنومادەني وكىلدەرى قۇشاق جايا قارسى الىپ, گۇل شوقتارىن ۇسىندى. قوناقتار الدىمەن اققايىڭ اۋدانىنداعى سميرنوۆو قارتتار ۇيىنە سوعىپ, تاعدىردىڭ تاۋقىمەتىمەن وسىندا تۇرىپ جاتقان جالعىزىلىكتى جاندارمەن كەزدەستى. 1971 جىلى بوي كوتەرگەن ينتەرناتتا 13 ەتنوستان قۇرالاتىن 345 تاربيەلەنۋشى بار. 38-ءى – تىل ەڭبەك­كەرلەرى. قارتتار ءۇيىنىڭ ديرەكتورى اندرەي سەمباەۆتىڭ ايتۋىنشا, مۇندا بارلىق الەۋمەتتىك جاعداي جاسالعان. كۇنىنە بەس رەت ىستىق تاماق بەرىلەدى. مەديتسينالىق بلوك, ستوماتولوگيالىق كابينەت جۇمىس ىستەيدى. ساپاردىڭ ءمان-ماقساتىن قازاقستان حالقى وبلىستىق اسسامبلەياسىنىڭ حاتشىلىق مەڭگەرۋشىسى ناايل ساليموۆ ايتىپ بەردى. – بيىل قازاقستان حالقى اسسام­بلەيا­سىنىڭ 20 جىلدىعى ەل كولەمىندە كەڭىنەن اتاپ وتىلەدى. وسىعان وراي ەلبا­سىنىڭ جارلىعىمەن قازاقستان حالقى اسسامبلەياسى جىلى جاريالاندى. ونداعى ماقسات – جۇرتشىلىقتى ساياسي قۇرىلىمنىڭ جۇمىسىمەن تانىستىرۋ, تاۋەلسىزدىگىمىزدىڭ اسىل قۇندىلىقتارىن ناسيحاتتاۋ. قارياسىن قادىرلەگەن ەلمىز عوي. اكتسيانىڭ العاشقى قادامىن سىزدەردەن باستاۋدى ۇيعاردىق, – دەگەن ول مولشىلىقتىڭ كەپىلى, جاقسىلىقتىڭ بەلگىسى, بارشىلىقتىڭ بازارى بولىپ تابىلاتىن تايقازاننىڭ نە سەبەپتى باستى سيمۆوليكالىق بەلگى رەتىندە العانىن ءتۇسىندىرىپ بەردى. وبلىس ورتالىعىنان كەلگەن كوركەمونەرپازدار ءان مەن جىردان شاشۋ شاشتى. قارتتار ۇيىنە پلازمالى تەلەديدار تارتۋ ەتىلدى. – اتا, ۇلى جەڭىستىڭ 70 جىلدىعى قارساڭىندا ءسىزدى ارنايى قۇتتىقتاۋعا كەلدىك, – دەدى دەلەگاتسيانى 90 جاستاعى سوعىس ارداگەرىنىڭ ۇيىنە باستاپ كەلگەن ەۆرەي قاۋىمداستىعىنىڭ توراعاسى راشبيل ەۆداەۆ ءسوزىن كەۋدەسى وردەندەر مەن مەدالدارعا تولى ءامىرحان مۇقانوۆ اقساقالعا قاراتا ايتىپ. –بيىلعى مەرەيلى مەرەكەلەر ۇلتتار مەن ۇلىستاردى ورتاق ماقساتقا جۇمىلدىرعان شارالارعا تولى. ۇلتارالىق تاتۋلىق پەن كەلىسىم – باستى بايلىعىمىز, التىن دىڭگەگىمىز. اسسامبلەيا – تۇتاستىقتىق پەن تۇراقتىلىقتىڭ كيەلى بەسىگى. 18 جاسىندا ارمياعا الىنىپ, بارلاۋ­شى رەتىندە ەرلىك ۇلگىلەرىن كورسەتكەن مايدانگەرگە سىيلىق تابىس ەتىلدى. دەلەگاتسيا مۇشەلەرى قىزىلجار اۋدانىنا قاراستى دامۋ مۇمكىندىگى شەكتەۋلى جانە اتا-انانىڭ قامقورلىعىنسىز قالعان بالالارعا ارنالعان تۇزەتۋ مەكتەپ-ينتەرناتىندا بولعاندا تاربيەلەنۋشىلەر تايقازاندى قىزىقتاپ, شىعۋ تاريحى جايلى سۇراسىپ جاتتى. ولارعا دا بازارلىق ۇلەستىرىلىپ, سىيلىق تابىستالدى. مۇنداي مازمۇندى جۇزدەسۋدەن مامليۋت مەكتەپ-ينتەرنات ءساناتوريىنىڭ بالدىرعاندارى دا شەت قالمادى. «التىن جۇرەك» اكتسياسى شەڭبەرىندە قايىرىمدىلىق شارالارى كورسەتىلدى. تىكەلەي ەفيردە ۇيىمداستىرىلعان كوشپەلى ءباسپاسوز كونفەرەنتسياسىنا اكىمدىكتىڭ جاۋاپتى قىزمەتكەرلەرى مەن قوعامدىق ۇيىم وكىلدەرى قاتىسىپ, اكتسيا اياسىندا اتقارىلعان جۇمىستارعا توقتالدى. تەلە ۇنقاتىسۋدى وبلىس اكىمىنىڭ ورىنباسارى انارحان دۇيسەنوۆا اشىپ, پرەزيدەنتتىڭ «ءبىزدىڭ باستى بايلىعىمىز – بىرلىگىمىز. مەن اۋىزبىرشىلىكتەن اينىمايتىن اقجۇرەك جۇرتىمنىڭ قۋاتتى ۇلتقا, شۋاقتى ۇلىسقا اينالارىنا كامىل سەنەمىن», دەگەن پايىمدارىن ەسكە سالا وتىرىپ, حالىقتار مەن دىندەر اراسىنداعى كەلىسىم قىزىلجار ءوڭىرىنىڭ دە باستى وزەگى بولىپ تابىلاتىنىن العا تارتتى. ونىڭ ءسوزىن «ورىس قاۋىمداستىعى» ۇيىمىنىڭ باسشىسى نيكولاي اۆدەەۆ, «قازاق ءتىلى» قوعامىنىڭ توراعاسى كارىباي مۇسىرمان, سقمۋ قازاقستان اسسامبلەياسى كافەدراسىنىڭ جەتەكشىسى ليۋدميلا گريۆەننايا, تاعى باسقالارى تولىقتىرىپ, ءبىزدىڭ وتانىمىز – ورتاق, تىلەگىمىز – ءبىر, ماقساتىمىز جالعىز. ماڭگىلىك ەل – اتا-بابالارىمىزدىڭ سان مىڭ جىلدان بەرگى اسىل ارمانى. كەلەشەگى كەمەل نۇرلى جولدا بىرلىگىمىز بەمەك, بوساعامىز بەرىك بولسىن دەگەن اقجول تىلەكتەر ايتتى. ەستافەتانىڭ سوڭعى نۇكتەسى پوگودين اتىنداعى ورىس دراما تەاترىندا قويىل­دى. وندا وبلىس اكىمىنىڭ ورىنباسارى ا.دۇيسەنوۆا قازاقستان حالقى اسسام­بلەياسى جىلىنىڭ اشىلۋ راسىمىنە وراي ۇيىمداستىرىلعان «20 يگى ءىس» ەستافەتاسىنىڭ سيمۆولى – تايقازاندى پاۆلودار وبلىستىق اسسامبلەياسىنىڭ حاتشىلىق مەڭگەرۋشىسى سەيسەنباي جەتپىسباەۆقا ءدۇيىم جۇرتشىلىقتىڭ الدىندا سالتاناتتى تۇردە تابىس ەتتى. سالتاناتتى ءراسىم سوڭى كونتسەرتكە ۇلاستى. ءومىر ەسقالي, «ەگەمەن قازاقستان». سولتۇستىك قازاقستان وبلىسى. سۋرەتتەردى تۇسىرگەن تالعات تانىباەۆ.