پرەمەر-مينيستر ولجاس بەكتەنوۆ جاھاندىق ينۆەستيتسيالار جونىندەگى VIII قازاقستاندىق دوڭگەلەك ۇستەلگە (KGIR-2025) قاتىستى. فورۋمعا 50-دەن استام ەلدەن 1 مىڭنان استام قاتىسۋشى, سونىڭ ىشىندە ونەركاسىپ, ەنەرگەتيكا, اوك, قارجى, فارماتسەۆتيكا, كونسالتينگ, باسقا دا سالالارداعى كومپانيالاردىڭ باسشىلىعى جينالدى.
ولجاس بەكتەنوۆ ءوز سوزىندە مەملەكەت باسشىسى قاسىم-جومارت توقاەۆ حالىققا جولداۋىندا جاڭا ينۆەستيتسيالىق تسيكلدى ىسكە قوسۋ قاجەتتىگىن اتاپ كورسەتكەنىن باسا ايتتى. باستى مىندەت – مەملەكەت تەك بيزنەستى سۇيەمەلدەپ قانا قويماي, جاڭا جوبالاردى قۇرۋعا, ىسكە قوسۋعا بەلسەندى قاتىساتىن ۇلگىگە كوشۋ ارقىلى بەلسەندى ينۆەستيتسيالىق ساياساتتى جۇزەگە اسىرۋ.
ۇكىمەت ۇلتتىق ەكونوميكانى ترانسفورماتسيالاۋ بويىنشا جۇيەلى جۇمىس جۇرگىزىپ وتىر. بيىلعى 9 ايدا ەلىمىزدەگى ءىجو كولەمى 6,3%-عا ءوستى. نەگىزگى كاپيتالعا سالىنعان ينۆەستيتسيا كولەمى 13,5%-عا ارتىپ, شامامەن 13,8 ترلن تەڭگەگە جەتتى. جالپى, قازاقستاننىڭ ينۆەستيتسيالىق دەڭگەيىن الەمنىڭ جەتەكشى رەيتينگتىك اگەنتتىكتەرى راستادى. اتاپ ايتقاندا, «Moody’s» ەلىمىزدىڭ ۇزاقمەرزىمدى رەيتينگىن «تۇراقتى» دەگەن بولجاممەن تاۋەلسىز قازاقستان تاريحىنداعى ەڭ ۇزدىك كورسەتكىشكە دەيىن كوتەردى.
ستراتەگيالىق ماڭىزى بار ترانسكاسپي حالىقارالىق كولىك باعىتى ينۆەستيتسيا ءۇشىن كەلەشەگى زور ايماق رەتىندە ايقىندالدى. تحكب بويىنشا ءىرى ينفراقۇرىلىمدىق بىرقاتار جوبا, سونىڭ ىشىندە شەتەلدىك كاپيتال مەن حالىقارالىق قارجى ينستيتۋتتارىنىڭ قاتىسۋىمەن جۇزەگە اسىرىلىپ جاتىر.
مەملەكەت باسشىسىنىڭ اۋقىمدى تسيفرلاندىرۋ, جاساندى ينتەللەكت تەحنولوگيالارىن ەنگىزۋ جونىندەگى تاپسىرماسىن جۇزەگە اسىرۋعا ەرەكشە نازار اۋدارىلدى. وزىق شەشىمدەردى ەنگىزۋگە جانە ستارتاپتاردى ودان ءارى جەدەلدەتۋگە باعىتتالعان «Alem.ai» حالىقارالىق جي ورتالىعىنىڭ اشىلۋى تسيفرلىق كلاستەردى نىعايتۋعا ىقپال ەتەدى.
«استانا» حالىقارالىق قارجى ورتالىعىندا بيزنەستى جۇرگىزۋ ءۇشىن بىرەگەي جاعداي ۇسىنىلادى. احقو بازاسىندا اعىلشىن قۇقىعى يۋريسديكتسياسى زاڭدى راسىمدەردىڭ اشىقتىعىنا كەپىلدىك بەرەدى. سونداي-اق ورتالىق «جاسىل», يسلامدىق جانە يننوۆاتسيالىق قارجى قۇرالدارىن دامىتۋ ءۇشىن سەنىمدى سەرىكتەس رەتىندە قىزمەت ەتەدى.
سونىمەن قاتار ولجاس بەكتەنوۆ دوڭگەلەك ۇستەلگە قاتىسۋشىلارمەن بىرقاتار كەزدەسۋ وتكىزدى. وندا اگروونەركاسىپ كەشەنى, ەنەرگەتيكا, كوممۋنالدىق سەكتورلار جانە باسقا دا سالالارداعى اعىمداعى جانە پەرسپەكتيۆالىق جوبالار اياسىندا ينۆەستيتسيالىق ىنتىماقتاستىق باعىتتارى قارالدى.
ەۋروپالىق قايتا قۇرۋ جانە دامۋ بانكىنىڭ ۆيتسە-پرەزيدەنتى ماتتەو پاترونەمەن بانكتىڭ قازاقستان اۋماعىندا ينفراقۇرىلىمدىق جوبالارعا قاتىسۋ ماسەلەلەرى تالقىلاندى. سونداي-اق شاعىن جانە ورتا بيزنەستى دامىتۋ باعىتتارىنا نازار اۋدارىلدى.
رەسەي, بەلارۋس, كاۆكاز جانە ورتالىق ازيا ايماعى بويىنشا «PepsiCo» كومپانياسىنىڭ پرەزيدەنتى دەۆيد مانزينيمەن كەزدەسۋ بارىسىندا الماتى وبلىسىندا قۇرىلىسى اقتالۋعا جاقىن تۇرعان زاۋىت جونىندەگى جوبانىڭ ىسكە اسىرىلۋ بارىسى قارالدى. ءوڭىر اكىمدىكتەرىنە ءتيىستى مەملەكەتتىك ورگاندارمەن بىرلەسىپ, ينۆەستيتسيالىق جوبانى قاجەتتى ينفراقۇرىلىمدىق شەشىمدەرمەن قامتاماسىز ەتۋگە ودان ءارى جاردەمدەسۋ تاپسىرىلدى.
«Fufeng Group» ديرەكتورلار كەڭەسىنىڭ توراعاسى لي سيۋەچۋنمەن جامبىل وبلىسىندا جۇگەرىنى تەرەڭ وڭدەۋ بويىنشا تىگىنەن ينتەگراتسيالانعان ونەركاسىپتىك پارك جوباسىن جۇزەگە اسىرۋعا كوڭىل ءبولىندى. ءوندىرىس وتاندىق شيكىزاتقا نەگىزدەلەتىن بولادى. ينۆەستور الداعى ءوندىرىستى ىسكە قوسۋ ءۇشىن «جىلدام ءدالىز» تەتىگى شەڭبەرىندە قولايلى بيزنەس-ورتانى جانە جاسالعان جاعدايلاردى وڭ باعالادى.
كەزدەسۋلەردىڭ قورىتىندىسى بويىنشا ولجاس بەكتەنوۆ ەل ۇكىمەتى ينۆەستورلارعا جان-جاقتى قولداۋ كورسەتىپ جانە بيزنەس-جوبالاردى تولىق سۇيەمەلدەۋگە باسا نازار اۋدارا وتىرىپ, قولايلى ينۆەستيتسيالىق احۋالدى قالىپتاستىرۋدى جالعاستىراتىنىن اتاپ ءوتتى. جاڭا وندىرىستەردى ىسكە قوسۋ ەلدىڭ ونەركاسىپتىك جانە ەكسپورتتىق الەۋەتىن نىعايتۋ, سونداي-اق جاڭا جۇمىس ورىندارىن اشۋ ءۇشىن ستراتەگيالىق ماڭىزعا يە.