استانا. 7 تامىز. قازاق حاندىعىنىڭ 550 جىلدىعىنا وراي قازاقستان جوعارى وقۋ ورىندارى اراسىندا وتكەن VIII جازعى ۋنيۆەرسيادا ءوز مارەسىنە جەتتى. ونىڭ ناتيجەسى بويىنشا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جالپى ەسەپتە جەڭىمپاز اتاندى. اتالعان وقۋ ورنى جارىس بارىسىندا 17 التىن جانە 2 كۇمىس مەدالعا قول جەتكىزدى. بۇل تۋرالى ۋنيۆەرسيتەتتىڭ ءباسپاسوز قىزمەتى حابارلادى.
سپورت شاراسىنا ەلىمىزدىڭ بارلىق اۋماعىنان 92 كوماندا قاتىستى. ويىندار وسى جىلدىڭ 1 ماۋسىمى مەن 10 شىلدەسى ارالىعىندا استانا, الماتى, قاراعاندى, قوستاناي, تاراز, شىمكەنت, تالدىقورعان جانە سەمەي قالالارىندا وتكىزىلدى. قاتىسۋشىلار سپورتتىڭ 32 تۇرىنەن سىنعا ءتۇستى.
جالپى ەسەپتەگى كۇمىس جۇلدە ءال-فارابي اتىنداعى قازاق ۇلتتىق ۋنيۆەرسيتەتىنە, ال قولا مەدال مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنە بۇيىردى.
جازعى ۋنيۆەرسيادا قازاقستان جوعارى وقۋ ورىندارى اراسىنداعى ەڭ ءىرى جانە كەشەندى سپورت شاراسى بولىپ تابىلادى. سول سەبەپتى, بۇل سايىستىڭ ءباسى ايتارلىقتاي جوعارى دەڭگەيدە.
ەۋرازيا ۇلتتىق ۋنيۆەرسيتەتىنىڭ رەكتوراتى, قىزمەتكەرلەرى مەن پورفەسسور-وقىتۋشىلار قۇرامى جوعارى وقۋ ورنىنىڭ ستۋدەنتتىك قوعامىنا جەڭىسكە دەگەن جىگەرى جانە سالاۋاتتى ءومىر سالتىنا ۇمتىلىسى ءۇشىن ۇلكەن ريزاشىلىق بىلدىرەدى. جاڭا وقۋ جىلىندا ۋنيۆەرسيادادا توپ جارعان جانە جۇلدەگەر اتانعان ستۋدەنتتەر مەن ولاردىڭ جاتتىقتىرۋشىلارى باسشىلىق تاراپىنان ماراپاتتالاتىنىن ايتا كەتەيىك.
ەلامان قوڭىر.
دەرەك, سۋرەت: ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ءباسپاسوز قىزمەتى.