مەملەكەت باسشىسى ۇكىمەتكە ينجەنەرلەردىڭ جاڭا بۋىنىن تاربيەلەۋ جونىندە تاپسىرما بەرگەن ەدى. وسىعان وراي س.وتەباەۆ اتىنداعى اتىراۋ مۇناي جانە گاز ۋنيۆەرسيتەتىنىڭ بازاسىندا ي.گۋبكين اتىنداعى رەسەي مەملەكەتتىك مۇناي-گاز ۋنيۆەرسيتەتىنىڭ فيليالى جۇمىسىن باستادى. ەلىمىزدىڭ جاستارى «مۇناي-گاز قۇبىرلارى مەن مۇناي-گاز قويمالارىن سالۋ جانە پايدالانۋ», «مۇناي-گاز تەحنولوگيالارى», «مۇناي مەن گازدىڭ تابيعي رەزەرۆۋارلارىن گەولوگيالىق مودەلدەۋ» ماماندىقتارىندا ءبىلىم الادى. بۇل ءبىلىم بەرۋ باعدارلامالارىنىڭ ترانسفەرىن قامتاماسىز ەتىپ, بىرلەسكەن عىلىمي-زەرتتەۋ جۇمىسىن جۇزەگە اسىرۋعا جول اشادى.
ۋنيۆەرسيتەت رەكتورى گۇلزادا شاكۋليكوۆانىڭ ايتۋىنشا, بيىل اتالعان فيليالدا ەلىمىزدىڭ جاستارىن 100 ءبىلىم گرانتى بولىنگەن. مۇناي-گاز سەكتورىنا قىزىعۋشىلىق تانىتقان جاستار الەمدىك دەڭگەيدەگى ساپالى بىلىمگە قول جەتكىزدى.
ء«بىز رەسەيلىك ارىپتەستەرىمىزبەن اراداعى سەرىكتەستىك ارقىلى بولاشاق ينجەنەرلەر مەن كاسىبي مامانداردى دايارلاۋدا جاڭا بەلەسكە قادام باستىق. فيليالدا ءبىلىم الاتىن جاستاردان قابىلداۋ ەمتيحاندارىن ي.گۋبكين اتىنداعى ۋنيۆەرسيتەتتىڭ تاجىريبەلى پروفەسسور-وقىتۋشىلار قۇرامى جۇرگىزدى», دەيدى گ.شاكۋليكوۆا.
رەسەيلىك وقۋ ورنى فيليالىنىڭ ديرەكتورى ۆلاديمير مايەردىڭ پىكىرىنشە, قازاقستاندىق ستۋدەنتتەر ي.گۋبكين ۋنيۆەرسيتەتىنىڭ جەتەكشى پروفەسسورلارى مەن تاجىريبەلى عالىمدارىنان تىكەلەي ءدارىس الادى. بۇل – ءبىلىم ساپاسىنىڭ جوعارى دەڭگەيىن, سونداي-اق عىلىم مەن ءوندىرىستىڭ ءوزارا تىعىز بايلانىسىن قامتاماسىز ەتەتىن زور مۇمكىندىك.
«اتىراۋداعى فيليالدا جەرگىلىكتى ستۋدەنتتەرگە بىرەگەي ءبىلىم بەرۋ باعدارلامالارىن يگەرۋ ءۇشىن زاماناۋي زەرتحانالار, سيمۋلياتسيالىق وقۋ ورتالىقتارى اشىلدى. وقۋ ۇدەرىسى تەوريا مەن تاجىريبەنى ۇشتاستىرۋعا باعىتتالادى. ستۋدەنتتەر ناقتى وندىرىستىك ۇدەرىستەردى مودەلدەۋ, زەرتحانالىق جۇمىستار جۇرگىزۋ ارقىلى ساپالى ءبىلىم الىپ, مۇناي-گاز سالاسىندا جوعارى بىلىكتى ءارى باسەكەگە قابىلەتتى مامان بولىپ قالىپتاسادى», دەيدى ۆ.مايەر.
سونداي-اق س.وتەباەۆ اتىنداعى اتىراۋ مۇناي جانە گاز ۋنيۆەرسيتەتىندە بولاشاق مۇنايشىلاردى دايارلايتىن وقۋ-وندىرىستىك پوليگونى جۇمىسىن باستادى. ۋنيۆەرسيتەت رەكتورى گۇلزادا شاكۋليكوۆانىڭ دەرەگىنە قاراعاندا, پوليگوننىڭ اۋماعى 4 گەكتاردى قۇرايدى.
ء«بىزدىڭ ۋنيۆەرسيتەتتىڭ باستى مىندەتى – مۇناي-گاز سەكتورىنا قاجەتتى بىلىكتى مامانداردى دايارلاۋ. وسىعان وراي مۇناي كومپانيالارىمەن ارىپتەستىك ينتەگراتسيا اياسىندا اشىلعان وقۋ پوليگونىن جەر قويناۋىن بارلاۋ, شيكىزاتتىق كومىرسۋتەكتى وڭدەۋگە دەيىنگى وندىرىستىك ۇدەرىستەردىڭ تولىق تسيكلى بار مۇناي-گاز ءوندىرۋ مەكەمەسىنىڭ شاعىن مودەلى دەۋگە بولادى. پوليگوندا جاتتىعۋ ەلەمەنتتەرى وندىرىستىك جاعدايلارعا بارىنشا ۇقساس ەتىپ سالىندى. ستۋدەنتتەردىڭ ناقتى وپەراتسيالىق مىندەتتەردى شەشۋگە, مۇناي-گاز تەحنولوگيالارىن يگەرۋگە مۇمكىندىگى بار. مۇندا ەلەكترلى گازبەن دانەكەرلەۋشى, توكار, وپەراتور, ماشينيست, باسقا دا ماماندار تاجىريبەدەن وتەدى», دەيدى گ.شاكۋليكوۆا.
رەكتوردىڭ مالىمەتىنە سۇيەنسەك, وقۋ ورنىندا 2015 جىلدان بەرى دۋالدى وقىتۋ جۇيەسى قولعا الىنعان. ەندى وقۋ پوليگونىندا ستۋدەنتتەر جوعارى تۇتقىرلى مۇناي ءوندىرۋ مەن وڭدەۋدە جاڭا تەحنولوگيالاردى مەڭگەرەدى. پوليگون جۇمىسىنا جاساندى ينتەللەكت (AI) ەلەمەنتتەرى مەن تسيفرلىق تەحنولوگيالار ەنگىزىلىپ جاتىر. ونىڭ ىشىندە تسيفرلىق كەن ورىندارىنىڭ ەگىزدەرى (digital twins) ۇدەرىستەردى مودەلدەۋگە, تاۋەكەلدەردى ازايتۋعا, وقۋ كەزىندە شىنايى وندىرىستىك جاعدايلاردى قايتا جاڭعىرتۋعا مۇمكىندىك بەرەدى. مۇنداي ەرەكشەلىك ستۋدەنتتەرگە قوندىرعىلاردىڭ جۇمىسىن ۆيرتۋالدى ورتادا سىناپ كورۋگە, اپاتتىق جاعدايلاردى بولدىرماۋ ءۇشىن شەشىمدەردى پىسىقتاۋعا, ءتيىمدى وندىرىستىك ستراتەگيالاردى ازىرلەۋگە جول اشادى.
«وقۋ-وندىرىستىك پوليگونى – باتىس ايماقتا تەحنيكالىق ءبىلىم بەرۋدىڭ جاڭا كەزەڭىنىڭ العاشقى قادامى. ەڭبەك باستىسى, ەڭبەك نارىعىنا باسەكەگە قابىلەتتى مامانداردى دايارلاۋعا زور سەرپىن بەرەدى. پوليگون زاماناۋي زەرتحانامەن, كاسىبي داعدىلاردى جەتىلدىرۋگە ارنالعان وقۋ-وندىرىستىك الاڭدارمەن, تاجىريبەلىك قوندىرعىلارمەن, يننوۆاتسيالىق شەشىمدەردى تەستىلەۋ الاڭدارىمەن جابدىقتالدى. جەراستى جوندەۋ جۇمىستارىن جۇرگىزۋدى ۇيرەتۋ ءۇشىن ەكى ۇڭعىما بۇرعىلاندى. ستۋدەنتتەردىڭ تاڭداعان ماماندىعىنا ساي پراكتيكالىق تاپسىرمالاردى ورىنداۋى ءۇشىن 15 وقۋ الاڭى سالىندى», دەيدى ۋنيۆەرسيتەت رەكتورى.
اتىراۋ وبلىسى