سالادا ىنتىماقتاستىق ارتا تۇسەدى

– قازىرگى جوعارى وقۋ ورنى – تەك ءدارىس وقيتىن ورىن ەمەس, قوعامنىڭ ينتەللەكتۋالدىق قۋاتىن قالىپتاستىراتىن, جاڭا يدەيالار مەن تەحنولوگيالار وندىرەتىن ءبىلىم يندۋسترياسىنىڭ باستى وزەگى. ۋنيۆەرسيتەت ەندى تەك ءبىلىم بەرۋشى ەمەس, ەلدىڭ ەكونوميكالىق, مادەني, يننوۆاتسيالىق دامۋىنا ىقپال ەتەتىن ورتالىققا اينالۋعا ءتيىس.

بۇگىنگى زامان ۋنيۆەرسيتەتى ءۇش باعىتتا دامىپ كەلەدى. بىرىنشىدەن, ءبىلىمدى بەرۋ, ياعني وقىتۋ ۇدەرىسى – كەز كەلگەن وقۋ ورنىنىڭ باستى ميسسياسى. وسى ارقىلى ستۋدەنتتەر ىرگەلى عىلىمدى مەڭگەرىپ, تاجىريبەلىك قابىلەتىن شىڭدايدى. ەكىنشىدەن, جاڭا ءبىلىم جاساۋ – عىلىمي زەرتتەۋ مەن ىزدەنىستىڭ ناتيجەسى. ناعىز ۋنيۆەرسيتەت جاڭا يدەيالاردى تاۋىپ, ولاردى عىلىمي اينالىمعا ەنگىزەدى. ۇشىنشىدەن, ءبىلىمدى اينالىمعا ەنگىزۋ, ياعني الىنعان عىلىمي ناتيجەلەردى نارىق تالابىنا بەيىمدەۋ – قازىرگى زامان تالابى. بۇل باعىت ينتەللەكتۋالدىق مەنشىكتى دامىتىپ, جاڭا تەحنولوگيالاردى كوممەرتسيالاندىرۋعا جول اشادى. وسى تۇرعىدان العاندا, كەيىنگى جىلدارى اريزونا ۋنيۆەرسيتەتى مەن م.قوزىباەۆ اتىنداعى سولتۇستىك قازاقستان مەم­لەكەتتىك ۋنيۆەرسيتەتى ارا­سىنداعى سەرىكتەستىك – قازاق­ستاندىق جوعارى ءبىلىم جۇيەسىنىڭ جاڭا كەزەڭگە اياق باسقانىنىڭ ايقىن كورىنىسى. ءتورت-بەس جىل بويى تابىستى جۇزەگە اسىپ كەلە جاتقان ميكرو-كامپۋس جوباسى سونىڭ دالەلى. جوبا اياسىندا ەكى ەلدەن 200-دەن استام ستۋدەنت ءبىلىم مەن تاجىريبە الماسىپ, حالىقارالىق عىلىمي بايلانىس نىعايدى. مۇنداي باستامالار قازاقستان مەن اقش جوعارى وقۋ ورىندارىنىڭ ىنتىماقتاستىعىن جاڭا ساپا­لىق دەڭگەيگە كوتەرىپ, ءبىلىم بەرۋ كەڭىستىگىن حالىقارالىق ستاندارتتارعا ساي ەتۋگە مۇم­كىن­دىك بەرىپ وتىر.

مەنىڭ پايىمىمشا, ەندىگى نەگىزگى ماقسات – م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىن تەك وقىتۋ باعىتىمەن شەكتەلمەي, الەمدىك دەڭگەيدەگى زەرتتەۋ ۋنيۆەرسيتەتىنە اينالدىرۋ. بۇل – ءبىر عانا وقۋ ورنىنىڭ ەمەس, تۇتاس ايماقتىڭ عىلىمي جانە تەحنولوگيالىق الەۋەتىن ارتتىرۋعا باعىتتالعان ستراتەگيالىق جوبا. زەرتتەۋ ۋنيۆەرسيتەتى دەگەنىمىز – جاڭا ءبىلىم وندىرەتىن, ونى قوعام مەن ەكونوميكا قاجەتىنە ۇسى­نا­تىن, يننوۆاتسيالىق ەكو­جۇيەنىڭ وزەگىنە اينالعان وقۋ ورنى. ەگەر م.قوزىباەۆ اتىن­داعى سولتۇستىك قازاقستان مەم­لە­كەتتىك ۋنيۆەرسيتەتى وسى با­عىت­تا جۇيەلى تۇردە دامىسا, وندا ايماقتىق يننوۆاتسيالىق كلاستەرلەردىڭ, تەحنوپاركتەر مەن ستارتاپتاردىڭ قالىپ­تاسۋىنا دا قۋاتتى سەرپىن بە­رە­دى. سوندىقتان قازىرگى مىندەت – ۋنيۆەرسيتەتتىڭ عىلىمي ينفرا­قۇرىلىمىن كۇشەيتىپ, حا­لىقارالىق جوبالارعا بەل­سەندى قاتىسۋ, سونداي-اق جاس­تاردى زەرتتەۋ مادەنيەتىنە باۋلۋ. سەبەبى عىلىم مەن ءبىلىمنىڭ توعىسقان تۇسىندا عانا ەلدىڭ ينتەل­لەكتۋالدىق الەۋەتى ارتادى.