رەسپۋبليكا كۇنىندە 16 جاس عالىمعا پاتەر سەرتيفيكاتتارىن سالتاناتتى تۇردە تابىستادى. بۇل تۋرالى عىلىم جانە جوعارى ءبىلىم مينيسترلىگى حابارلادى, دەپ حابارلايدى Egemen.kz.
سالتاناتتى جيىندا ءسوز العان عىلىم جانە جوعارى ءبىلىم ءمينيسترى ساياسات نۇربەك جاس عالىمداردىڭ ءومىر ساپاسى مەن الەۋمەتتىك ءال-اۋقاتى مەملەكەت باسشىسىنىڭ ەرەكشە نازارىندا ەكەنىن اتاپ ءوتتى.
«عىلىم تەك يدەيا مەن ىزدەنىستەن عانا تۇرمايدى, بۇل تۇراقتى قولداۋ مەن قولايلى جاعدايدى دا قاجەت ەتەدى. بۇگىن ۇلتتىق مەرەكە قارساڭىندا 16 جاس عالىمعا پاتەر كىلتتەرى تابىستالىپ جاتىر. بۇل – مەملەكەتىمىزدىڭ جاس زەرتتەۋشىلەرگە كورسەتىپ وتىرعان جۇيەلى قولداۋىنىڭ جانە عىلىم سالاسىن دامىتۋعا دەگەن بەرىك ۇستانىمىنىڭ ايقىن كورىنىسى. سونداي-اق بۇگىن پرەزيدەنت قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا, ا.بايتۇرسىن ۇلى اتىنداعى گۋمانيتارلىق عىلىمدار سالاسىنداعى 2025 جىلعى مەملەكەتتىك سىيلىقتارىن بەرۋ تۋرالى جارلىققا قول قويدى. وتاندىق عىلىمنىڭ دامۋىنا سەرپىن بەرىپ جۇرگەن كورنەكتى تۇلعالاردىڭ ەڭبەگى لايىقتى باعالانىپ, ولاردىڭ جەتىستىگى جاس بۋىنعا ونەگە, ەل ابىرويىنىڭ ايعاعىنا اينالدى», دەدى س.نۇربەك.
پرەزيدەنتتىڭ 2024 جىلعى 31 مامىردا عىلىم ورداسىندا جاس عالىمدارمەن كەزدەسۋىندە بەرگەن تاپسىرماسىن ورىنداۋ ماقساتىندا عالىمداردىڭ الەۋمەتتىك مارتەبەسىن كوتەرۋ جانە قولداۋ كورسەتۋ, سونداي-اق عىلىمعا جاس كادرلاردىڭ كەلۋىن ىنتالاندىرۋ ءۇشىن كوميسسيا الماتى قالاسىندا باسپانا بەرۋ ءۇشىن عىلىمي ۇيىمدار مەن جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ جاس عالىمدارىنىڭ كەزەكتى ءتىزىمىن ايقىندادى.
عىلىم جانە جوعارى ءبىلىم مينيسترلىگى 2024 جىلعى مامىر ايىنان باستاپ باسپاناعا مۇقتاج جاس عالىمداردىڭ (40 جاسقا دەيىن قوسا العاندا) ءتىزىمىن قالىپتاستىرۋ بويىنشا جۇمىس جۇرگىزىپ كەلەدى. مينيسترلىك بۇل جۇمىستى كەزەڭ-كەزەڭىمەن جۇزەگە اسىرىپ كەلەدى. نەگىزگى ماقسات – جاس عالىمدارعا قولايلى الەۋمەتتىك جاعداي جاساۋ ارقىلى ولاردىڭ عىلىمي الەۋەتىن ارتتىرۋ جانە عىلىممەن تۇراقتى اينالىسۋعا ىنتالاندىرۋ. جاس عالىمدار سانىنىڭ ارتۋى ەلدەگى عىلىمي-زەرتتەۋ قىزمەتىنىڭ ساپاسى مەن تيىمدىلىگىن كوتەرىپ, يننوۆاتسيالىق يدەيالار مەن جاڭا تەحنولوگيالاردىڭ دامۋىنا سەرپىن بەرەدى. بۇل ءوز كەزەگىندە قازاقستاننىڭ عىلىم مەن جوعارى ءبىلىم سالاسىنداعى باسەكەگە قابىلەتتىلىگىن ارتتىرۋعا ىقپال ەتەدى.
سونىمەن قاتار 2023 جىلعى 19 قازاندا عىلىم جانە جوعارى ءبىلىم مينيسترلىگى مەن «وتباسى بانك» اق اراسىندا جاس عالىمدارعا 2023-2027 جىلدارعا ارنالعان جەڭىلدەتىلگەن كرەديت بەرۋ باعدارلاماسى بويىنشا ىنتىماقتاستىق تۋرالى كەلىسىمگە قول قويدى. قازىرگى ۋاقىتتا اتالعان باعدارلاما بويىنشا 482 جاس عالىم جەڭىلدىكپەن باسپانا الدى.