بەينەۋ اۋدانىنا قاراستى تاجەن اۋىلىندا 25 قازان – رەسپۋبليكا كۇنى قارساڭىندا جاڭا مەديتسينالىق پۋنكت اشىلدى, دەپ حابارلايدى Egemen.kz ماڭعىستاۋ وبلىستىق قوعامدىق كوممۋنيكاتسيا ورتالىعىنا سىلتەمە جاساپ.
«وبلىس ورتالىعىنان شالعايدا, شەكارا ماڭىندا ورنالاسقان تاجەن اۋىلىندا مەديتسينالىق پۋنكتتىڭ اشىلۋى – تۇرعىندار ءۇشىن قۋانىشتى جاڭالىق. بۇعان دەيىن مەديتسينالىق قىزمەت اقجىگىت دارىگەرلىك امبۋلاتورياسىنىڭ قۇرامىندا كورسەتىلىپ كەلگەن بولسا, ەندى تۇرعىندار ءوز اۋىلىندا زامان تالابىنا ساي مەديتسينالىق كومەك الا الادى. بۇل نىسان مەملەكەت باسشىسىنىڭ تاپسىرماسىنا سايكەس قازاقستان رەسپۋبليكاسى ۇكىمەتىنىڭ 2022 جىلعى 30 قاراشاداعى №962 قاۋلىسى نەگىزىندە «اۋىلدا دەنساۋلىق ساقتاۋدى جاڭعىرتۋ» ۇلتتىق پيلوتتىق جوباسى اياسىندا سالىندى. ارينە, مەديتسينا نىسانىنىڭ اشىلعانى قۋانتادى, بىراق ەڭ باستىسى – شاقىرتۋلار از, حالىقتىڭ دەنى ساۋ بولسىن», دەدى بەينەۋ اۋدانىنىڭ اكىمى راحىمجان شالباەۆ.
جاڭا مەديتسينالىق پۋنكت زامانعا ساي قۇرىلعىلارمەن جابدىقتالىپ, تۇرعىندارعا ساپالى قىزمەت كورسەتۋگە بارلىق جاعداي جاسالعان. مۇندا ەكى مەديتسينا قىزمەتكەرى ەڭبەك ەتەدى.
ماڭعىستاۋ وبلىسى