Elorda Aqparat مەدياحولدينگىنىڭ ۇيىمداستىرۋىمەن رەسپۋبليكا كۇنىنە, سونداي-اق «استانا اقشامى» جانە «ۆەچەرنيايا استانا» گازەتتەرىنىڭ 35 جىلدىق مەرەيتويىنا وراي جۋرناليستەر اراسىنداعى ءداستۇرلى بيليارد ءتۋرنيرى ءوتتى, دەپ جازادى Egemen.kz.
بيىل ءتورتىنشى رەت ۇيىمداستىرىلعان دوداعا ەلورداداعى قالامگەرلەر, جۋرناليستەر, قوعام قايراتكەرلەرى مەن زيالى قاۋىم وكىلدەرى قاتىستى.
ءىس-شارانىڭ اشىلۋىندا استانا قالالىق قوعامدىق كەڭەسىنىڭ توراعاسى زۇلفۋحار عايىپوۆ ءسوز سويلەپ, ەگەمەندىكتىڭ باستاۋى سانالاتىن رەسپۋبليكا كۇنى مەرەكەسىنىڭ تاريحي ءمانى مەن ماڭىزىنا توقتالىپ, جينالعانداردى رەسپۋبليكا كۇنىمەن قۇتتىقتادى.
«بۇگىنگى جەتىستىگىمىزدىڭ ءبارى – بەيبىت زاماننىڭ, توقشىلىق ءداۋىردىڭ, ەگەمەن ەل بولعانىمىزدىڭ ارقاسى. باس قالامىزدىڭ تاريحىن عانا ەمەس, تاۋەلسىز قازاقستاننىڭ ءاربىر تاريحي كۇنىنىڭ كۋاگەرى قوس باسىلىمنىڭ مەرەيتويى قۇتتى بولسىن», - دەدى ول.
سونداي-اق قر پارلامەنتى سەناتىنىڭ دەپۋتاتى التىنبەك نۇح ۇلى قاتىسۋشىلاردى مەرەكەمەن جانە قوس باسىلىمنىڭ 35 جىلدىق مەرەيتويىمەن قۇتتىقتاپ, Elorda Aqparat مەدياحولدينگى ديرەكتورى ولجاس سىدىقبەك پەن «استانا اقشامى» گازەتىنىڭ باس رەداكتورى ەركىن قىدىرعا شاپان جاۋىپ, اكادەميك قانىش ساتباەۆتىڭ 5 تومدىق ەڭبەگىن سىيعا تارتتى.
جارىستىڭ اشىلۋ سالتاناتىندا قازاق ادەبيەتىنىڭ كورنەكتى وكىلدەرى, جازۋشى تولەن ابدىك پەن قويشىعارا سالعارا ءسوز سويلەپ, قاتىسۋشىلارعا باتاسىن بەرىپ, ساتتىلىك تىلەدى.
«استانا اقشامى» گازەتىنىڭ بۇرىنعى رەداكتورلارىنا جانە كەلگەن قوناقتارعا ءسوز بەرىلىپ, جىلى ەستەلىكتەر مەن ىزگى تىلەكتەر ايتىلدى.
قالامگەرلەر اراسىنداعى ويىن وتە تارتىستى ءوتتى. تاستاياق شەبەرلەرىنىڭ ءبىرى ساقانى كوزدەسە, ەندى ءبىرى شاردى ءدال ۇپاي ۇياسىنا باعىتتاپ, سايىستىڭ كورىگىن قىزدىردى.
ءسويتىپ, ويىن ناتيجەسىندە ءۇشىنشى ورىندى تالعات ەشەن ۇلى مەن سادىبەك تۇگەل ۇلى, ەكىنشى ورىندى قايرات ساق, ال ءبىرىنشى ورىندى ناۋرىزبەك سارشا جەڭىپ الدى.
بۇدان بولەك, «العاشقى سوققى», «مادەنيەتتى ويىنشى», «مەرگەن ويىنشى», «شەبەر ويىنشى» سەكىلدى ارنايى اتالىمدار دا تابىستالدى.
Elorda Aqparat مەدياحولدينگىنىڭ ديرەكتورى ولجاس سىدىقبەك كورنەكتى جازۋشى تولەن ابدىككە مىرجاقىپ دۋلاتوۆ اتىنداعى, ال قويشىعارا سالعاراعا ءىلياس ەسەنبەرلين اتىنداعى ارناۋلى سىيلىقتى تاپسىردى.