ۇكىمەتتە ەگىن جيناۋ ناۋقانى جونىندەگى جەدەل شتاب وتىرىسى ءوتىپ, جاڭا ءونىم كەزەڭىنىڭ الدىن الا قورىتىندىلارى قارالدى.
مالىمەتتەرگە سۇيەنسەك, ءداندى داقىلدار بارلىق ەگىس القاپتارىنىڭ 99%-ىندا, ياعني 15,8 ملن گەكتاردا جينالدى. سونداي-اق بۇرشاقتى داقىلداردى جيناۋ ءىس جۇزىندە اياقتالىپ, 1 ملن توننادان استام رەكوردتىق كورسەتكىشكە جەتتى.
قازىر جۇگەرى (134 مىڭ گا, 77%), مايلى داقىلدار (3,5 ملن تەڭگە, 74%) جينالىپ جاتىر, كارتوپ (3 ملن تەڭگە), باسقا كوكونىستەر (3,9 ملن تەڭگە) مەن قاۋىن-قاربىز داقىلدارى بويىنشا جۇمىس (2,6 ملن تەڭگە) تولىعىمەن اياقتالدى. تىڭايتقىشتاردى دەر كەزىندە قوسۋ مەن بيىلعى كوكتەمگى دالا جۇمىستارىنا قارجىنى ەرتەرەك ءبولۋ جوعارى ناتيجەگە قول جەتكىزۋگە ەرەكشە ىقپال ەتتى.
ەگىس ناۋقانىنا بولىنگەن 700 ملرد تەڭگەنىڭ 502 ملرد-ى يگەرىلدى. اگرارلىق نەسيە كورپوراتسياسى ارقىلى 2026 جىلعى ەگىس ناۋقانىنا جەڭىلدەتىلگەن قارجىلاندىرۋعا فەرمەرلەردەن ءوتىنىم قابىلداۋ باستالدى. بۇعان قوسا اۋىل شارۋاشىلىعى تەحنيكاسىن جەڭىلدەتىلگەن ليزينگكە بەرۋ ءۇشىن بولىنگەن 250 ملرد تەڭگەگە قازىردىڭ وزىندە 253 ملرد تەڭگەنىڭ ءوتىنىمى قابىلداندى. بۇل – 8 مىڭعا جۋىق اۋىل شارۋاشىلىعى تەحنيكاسى جاڭارتىلادى دەگەن ءسوز.
«دامۋ» قورى ارقىلى كوكتەمگى, كۇزگى دالا جۇمىستارىنا ارنالعان نەسيەلەردىڭ 85%-ىنا دەيىنگى كەپىلدىك بەرۋ باعدارلاماسى جۇزەگە اسىرىلىپ وتىر. بۇل كەپىل بازاسى جەتكىلىكسىز شارۋالارعا كوكتەمگى ەگىس جۇمىستارىنا جەڭىلدەتىلگەن نەسيە الۋعا مۇمكىندىك بەرەدى. بۇگىندە جالپى سوماسى 196,9 ملرد تەڭگەگە 1336 كەپىلدىك بەرىلدى, ال قارىزداردىڭ جالپى كولەمى 231,7 ملرد تەڭگەگە جەتتى.
ليتسەنزيالانعان استىق ساقتاۋ قويمالارى ەگىن قابىلداۋ قىزعان شاقتا دا قالىپتى جاعدايدا جۇمىس اتقارىپ جاتىر, ياعني 5,4 ملن تونناسى (40%) تولدى, تاعى دا 7,8 ملن تونناعا جەتەرلىك بوس ورىن بار. ەگىن جيناۋ باستالعالى بەرى ەلەۆاتورلارعا 6,7 ملن توننا استىق تاپسىرىلدى, بۇل وتكەن جىلدىڭ ۇقساس كەزەڭىمەن سالىستىرعاندا ەكى ەسە كوپ (2024 جىلى – 3,4 ملن توننا).
جينالعان استىقتىڭ 54%-ى – ءۇشىنشى سىنىپتى بيداي. اۋىل شارۋاشىلىعى ۆيتسە-ءمينيسترى ازات سۇلتانوۆتىڭ ايتۋىنشا, قازان ايىنىڭ العاشقى ونكۇندىگىنەن باستاپ قانت زاۋىتتارى جاڭا ءونىمنىڭ قىزىلشاسىن قابىلداۋدى باستادى. «اقسۋ قانت» زاۋىتىندا كولىك كەزەگىن بولدىرماۋ ءۇشىن قىزىلشا قابىلداۋعا ەلەكتروندى كەزەك جۇيەسى ەنگىزىلدى. جالپى, جەتىسۋ وڭىرىندە 154 مىڭ توننا قانت قىزىلشاسى جينالدى.
ۆيتسە-پرەمەر نەگىزگى استىق ءوندىرۋشى وڭىرلەردىڭ اكىم ورىنباسارلارىنىڭ ەگىن جيناۋ بارىسى تۋرالى ەسەپتەرىن تىڭدادى. ايماقتار جەڭىلدەتىلگەن ديزەل وتىنىمەن تولىق قامتاماسىز ەتىلگەنى ايتىلدى, الايدا استىقتى كەپتىرۋگە ارنالعان كوگىلدىر وتىننىڭ جەتىسپەۋشىلىگى بايقالادى.
ۇكىمەت باسشىسىنىڭ ورىنباسارى استىق قابىلداۋ پروتسەسىن كىدىرىسسىز اياقتاۋ ءۇشىن ەنەرگەتيكا مينيسترلىگىنە وڭىرلەرگە قوسىمشا كوگىلدىر وتىن ءبولۋدى تاپسىردى.