مەملەكەت باسشىسىنىڭ اۋىلدا مەديتسينالىق قىزمەتتەردىڭ قولجەتىمدىلىگىن ارتتىرۋ جانە الەۋمەتتىك ماڭىزى بار ينفراقۇرىلىمدى دامىتۋ جونىندەگى تاپسىرماسىنا سايكەس, جەتىسۋ وبلىسىندا العاشقى مەديتسينالىق-سانيتاريالىق كومەك كورسەتەتىن فاپ, مەديتسينالىق پۋنكتتەر جانە دارىگەرلىك امبۋلاتوريا ەل يگىلىگىنە تاپسىرىلدى, دەپ جازادى Egemen.kz.
مەديتسينالىق نىساننىڭ بارلىعى ەلگە قايتارىلعان اكتيۆتەر قاراجاتى ەسەبىنەن سالىنعان.
ۇكىمەت وسى ماقساتقا ارناۋلى مەملەكەتتىك قوردان 1,7 ملرد تەڭگە بولگەن.
جاڭا دەنساۋلىق ساقتاۋ نىساندارى ايماقتاعى جالعىزاعاش جانە قاينارلى (ەسكەلدى اۋدانى) - سارىتوبە (پانفيلوۆ اۋدانى) - جاڭالىق (اقسۋ اۋدانى) - قاراتال (كوكسۋ اۋدانى) - ويان (قاراتال اۋدانى) اۋىلدارىندا ىسكە قوسىلىپ وتىر.
سونىمەن قاتار الاكول اۋدانى جايپاق اۋىلىندا دارىگەرلىك امبۋلاتوريا مەن قاينار اۋىلىندا فەلدشەرلىك-اكۋشەرلىك پۋنكت پايدالانۋعا بەرىلگەن.
نىسانداردىڭ بارلىعى ينجەنەرلىك ينفراقۇرىلىممەن, زاماناۋي مەديتسينالىق تەحنيكامەن جابدىقتالعان جانە العاشقى مەديتسينالىق-سانيتاريالىق كومەك كورسەتۋ ستاندارتتارىنا سايكەس كەلەدى. بۇل جوبالاردى جۇزەگە اسىرۋ شالعايداعى ەلدى مەكەندەردىڭ 4 مىڭنان استام تۇرعىنىن مەديتسينالىق كومەككە قولجەتىمدىلىكپەن قامتاماسىز ەتۋگە, سونداي-اق جاڭا جۇمىس ورىندارىن اشۋعا جانە ءوڭىردىڭ دەنساۋلىق ساقتاۋ جۇيەسىنىڭ ماتەريالدىق-تەحنيكالىق بازاسىن نىعايتۋعا مۇمكىندىك بەرەدى.