اتىراۋ وبلىسىندا 9 ايدا انىقتالعان 8 قارجىلىق پيراميدانىڭ سالىمشىلارى 2 مىڭنان اسقان, دەپ جازادى Egemen.kz.
اتىراۋ وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ باسقارما باسشىسى بەكبولات انەسوۆتىڭ مالىمەتىنشە, وسى كەزەڭدە 60 قىلمىستىق ءىس تەرگەۋگە الىنعان.
«دەپارتامەنت قىزمەتكەرلەرىنىڭ باستى مىندەتى – ەكونوميكالىق تۇراقتىلىقتى قامتاماسىز ەتىپ, قارجىلىق قۇقىق بۇزۋشىلىقتارعا جول بەرمەۋ. تەرگەۋگە الىنعان ءار ءىس ناقتى دالەلدەرگە سۇيەنىپ, مەملەكەتكە كەلتىرىلگەن شىعىندى وتەۋگە باعىتتالادى. جىل باسىنان بەرى 24 قىلمىستىق ءىستى تەرگەۋ اياقتالىپ, 22-ءسى سوتقا جولداندى», دەدى بەكبولات انەسوۆ.
ونىڭ دەرەگىنە سۇيەنسەك, انىقتالعان زالال سوماسى 1,5 ميلليارد تەڭگەدەن اسىپ وتىر. بۇل قارجىنىڭ 964 ميلليون تەڭگەسى قولما-قول قايتارىلدى.
«مەملەكەتكە قايتارىلعان جالپى زالال كولەمى م ۇلىككە توقتام سالۋ شارالارىن قوسا ەسەپتەگەندە, 3 ميلليارد تەڭگەگە جۋىقتادى. جىل باسىنان بەرى 8 قارجىلىق پيراميدا دەرەگى تىركەلدى. قارجىلىق پيراميدالاردىڭ سالىمشىلارىنىڭ جالپى سانى 2000-نان استى. تەرگەۋ كەزىندە كۇدىكتىلەردىڭ ەسەپشوتتارىنان 102 ميلليون تەڭگە بۇعاتتالدى», دەپ مالىمدەدى بەكبولات انەسوۆ.
سونداي-اق, اكتسيزدىك ماركاسى 117 مىڭ قوراپ تەمەكى مەن زاڭسىز اينالىمداعى ۆەيپ ونىمدەرى تاركىلەنگەن. ال جالعان شوت-فاكتۋرا راسىمدەۋ ارقىلى 8 ميلليارد تەڭگەدەن اساتىن سوماعا سالىقتان جالتارۋ دەرەگى انىقتالعان.
«ايىپتىلار كىنالى دەپ تانىلىپ, ولارعا 2 جىلدان 4 جىلعا دەيىنگى باس بوستاندىعىنان ايىرۋ جازاسى تاعايىندالدى. «كيبەرقاداعالاۋ» اقپاراتتىق جۇيەسى ارقىلى ينتەرنەت جەلىسىندە تىركەلگەن 3 135 سىلتەمە انىقتالىپ, 2 364-ءى بۇعاتتالدى», دەپ حاباردار ەتتى بەكبولات انەسوۆ.