اقتوبە. 19 اقپان. اقتوبەدە 2017 جىلعا دەيىن ايتەكە بي, ويىل جانە ىرعىز اۋداندارىنىڭ ورتالىقتارى گاز قۇبىرىنا قوسىلاتىن بولادى. بۇل تۋرالى وبلىستىق «اقتوبە « گازەتى حابارلادى.
وسى وڭىرلەردەگى 17 مىڭ تۇرعىن ارزان تابيعي وتىندى پايدالانۋ مۇمكىندىگىنە يە بولماق. جەرگىلىكتى ىلەسپە گاز تاعى دا 20 مىڭنان استام تۇرعىنى بار 30 ەلدى مەكەننىڭ يگىلىگىنە اينالادى دەپ كۇتىلۋدە. وسى كەزەڭدە وڭىردە 17 جوبانى جۇزەگە اسىرىپ, گاز ءبولۋ جەلىلەرىن قۇرىلىمداۋ قاراستىرىلۋدا. بۇعان 20 ميلليارد تەڭگە شاماسىنداعى قارجى جۇمسالاتىن بولادى. اقتوبە اگلومەراتسياسىن دامىتۋ جانە تۇرعىن ءۇي-كوممۋنالدىق شارۋاشىلىق ينفراقۇرىلىمدارىن جاڭعىرتۋ بويىنشا ەلباسى تاپسىرماسىنا سايكەس اقتوبە وبلىسىنىڭ اكىمشىلىگى «قازمۇنايگاز» ۇك» اق جانە «قازترانسگاز» اق اراسىندا ۇزاق مەرزىمدى جانە ءوزارا ءتيىمدى ىنتىماقتاستىق تۋرالى مەموراندۋمىنا قول قويىلدى. كەلىسىمگە سايكەس وبلىستا ءۇش اۆتوماتتاندىرىلعان گاز ءبولۋ ستانساسىنىڭ قۇرىلىسى قاراستىرىلىپ, گاز ءبولۋ جۇيەسىن جاڭعىرتۋ كوزدەلۋدە. سونداي-اق, جەكە سەكتورداعى تۇرعىن ۇيلەر ۋچاسكەسىنە دەيىن اۋىلىشىلىك گاز جەلىلەرىن جۇرگىزەتىن گاز قۇبىرى-بۇرۋ جەلىسى قۇرىلىسى قولعا الىنادى.
وبلىس اكىمى ارحيمەد مۇحامبەتوۆتىڭ ايتۋىنشا, ءبرىنشى كەزەكتە اقتوبە, سونداي-اق, العا, قاندىاعاش قالالارىندا اۆتوماتتاندىرىلعان گاز ءبولۋ ستانسالارى سالىناتىن بولادى. وبلىس باسشىسى, سونداي-اق اگلومەراتسيا قۇرامىنا ەنەتىن العا اۋدانىنداعى بوگوسلوۆكا, قارعالى اۋدانىنداعى قوسەستەك, حرومتاۋ اۋدانىنداعى اققۇدىق, مۇعالجار اۋدانىنداعى التىندى, تالدىساي, ەڭبەك سەلولارىنا گاز جەتكىزىلەتىنىن ايتتى. سونداي-اق, وسىنداي شارالاردىڭ ناتيجەسىندە وبلىستى ينتەنسيۆتى يندۋستريالدى دامىتۋ, اقتوبە قالاسىن اگلومەراتسيالىق پروتسەستەر ورتالىعى رەتىندە قۇرىلىمداۋ, كەڭ اۋقىمدا قۇرىلىس جۇمىستارىن جۇرگىزۋ, شاعىن جانە ورتا بيزنەستى دامىتۋ مۇمكىندىكتەرى اشىلا تۇسپەكشى.
ساتىبالدى ءساۋىرباي.
دەرەك: «اقتوبە « گازەتى.
سۋرەت: thenews.kz.