رەسپۋبليكا كۇنى مەرەكەسى قارساڭىندا مۇنايلى اۋدانىنىڭ ايراقتى ەلدى مەكەنىندە مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىرىلىپ جاتقان «كەلەشەك مەكتەپتەرى» ۇلتتىق جوباسى اياسىندا №21 جالپى ءبىلىم بەرەتىن مەكتەپتىڭ سالتاناتتى اشىلۋى ءوتتى. بۇل – ماڭعىستاۋ وبلىسىندا اتالعان باعدارلاما بويىنشا پايدالانۋعا بەرىلگەن ون ءبىرىنشى مەكتەپ, دەپ حابارلايدى Egemen.kz.
جاڭا ءبىلىم ورداسى 900 وقۋشىعا ارنالعان. سالتاناتتى شاراعا ماڭعىستاۋ وبلىسىنىڭ اكىمى نۇرداۋلەت قيلىباي قاتىسىپ, ۇستازدار مەن وقۋشىلاردى جاڭا ءبىلىم وشاعىنىڭ اشىلۋىمەن قۇتتىقتادى.
-مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىپ جاتقان «كەلەشەك مەكتەپتەرى» ۇلتتىق جوباسى – ەلىمىزدەگى ءبىلىم ساپاسىن ارتتىرۋعا باعىتتالعان ماڭىزدى قادام. زاماناۋي مەكتەپتەردىڭ اشىلۋى قالا مەن اۋىل اراسىنداعى الشاقتىقتى ازايتىپ, بالالاردىڭ الەۋەتىن اشۋعا جانە باسەكەگە قابىلەتتى ۇرپاق قالىپتاستىرۋعا مۇمكىندىك بەرەدى. بۇگىنگى مەكتەپتىڭ اشىلۋى – مۇنايلى اۋدانى تۇرعىندارى ءۇشىن ۇلكەن قۋانىش ءارى ءوڭىردىڭ الەۋمەتتىك دامۋىنا قوسىلعان ەلەۋلى ۇلەس, - دەدى ايماق باسشىسى.
جالپى اۋدانى 9 مىڭ شارشى مەتردەن اساتىن زاماناۋي مەكتەپتە 45 وقۋ كابينەتى بار. ولاردىڭ قاتارىندا ديزاين جانە تەحنولوگيا, تاماقتانۋ مادەنيەتى, ۆيزۋالدى ونەر, ءۇي مادەنيەتى, روبوتوتەحنيكا, STEM جانە مۋزىكا كابينەتتەرى قامتىلعان. ءبىلىم ورداسى وقۋشىلاردىڭ جان-جاقتى دامۋىنا جانە شىعارماشىلىق قابىلەتتەرىن اشۋعا قاجەتتى بارلىق جابدىقتارمەن قامتاماسىز ەتىلگەن. ەرەكشە ءبىلىمدى قاجەت ەتەتىن بالالار ءۇشىن سەنسورلىق بولمە, ينكليۋزيۆتى ءبىلىم بەرۋدى قولداۋ كابينەتى جانە ارنايى جەدەلساتى ورناتىلعان. وقۋشىلاردىڭ قاۋىپسىزدىگىن قامتاماسىز ەتۋ ماقساتىندا عيمارات تولىقتاي بەينەباقىلاۋ جۇيەسىمەن جابدىقتالعان, اۋماعىندا ويىن جانە سپورت الاڭدارى سالىنعان.
بۇعان دەيىن وڭىردە ۇلتتىق «كەلەشەك مەكتەپتەرى» جوباسى اياسىندا 9 مىڭنان استام وقۋشىعا ارنالعان 10 مەكتەپ اشىلعان بولاتىن. بيىلعى جىلدىڭ سوڭىنا دەيىن اقتاۋ مەن جاڭاوزەن قالالارىندا تاعى ەكى جاڭا مەكتەپتى پايدالانۋعا بەرۋ جوسپارلانىپ وتىر.