«قازاقستاننىڭ دامۋ بانكى» اق الماتى وبلىسىنداعى ەلتاي اۋىلىندا ءباسپاسوز تۋرىن ۇيىمداستىردى. ءىس-شاراعا رەسپۋبليكالىق جانە جەرگىلىكتى بۇقارالىق اقپارات قۇرالدارىنىڭ وكىلدەرى, تانىمال بلوگەرلەر, سونداي-اق اۋداندىق ءماسليحات دەپۋتاتتارى قاتىستى. ءباسپاسوز تۋرىنىڭ نەگىزگى ماقساتى – مەملەكەتتىك قولداۋ تەتىكتەرىنىڭ وڭدەۋشى ونەركاسىپتىڭ دامۋىنا, ءوندىرىس ۇدەرىستەرىن تسيفرلاندىرۋعا جانە ەكسپورتتىق الەۋەتتى ارتتىرۋعا قوسىپ جاتقان ۇلەسىن ناقتى مىسال ارقىلى كورسەتۋ بولدى. ءىس-شارا بارىسىندا قاتىسۋشىلار وندىرىستىك كاسىپورىنداردىڭ جۇمىسىمەن تانىسىپ, زاماناۋي تەحنولوگيالاردىڭ ەنگىزىلۋى مەن دامۋ بانكى تاراپىنان كورسەتىلگەن قارجىلىق قولداۋدىڭ ناقتى ناتيجەلەرىن كوزبەن كوردى. سونداي-اق مەملەكەت تاراپىنان ۇسىنىلعان قارجىلىق جانە ينستيتۋتسيونالدىق قولداۋ قۇرالدارى وڭدەۋشى ونەركاسىپتى دامىتۋدا ماڭىزدى ءرول اتقارىپ جاتقانىنا تاعى ءبىر مارتە كوز جەتكىزدى, دەپ جازادى Egemen.kz.
مەملەكەت باسشىسى قاسىم-جومارت توقاەۆ ءوز جولداۋىندا ەكونوميكانى ءارتاراپتاندىرۋ مەن «جاسىل» تەحنولوگيالاردى ەنگىزۋدىڭ ماڭىزدىلىعىنا ەرەكشە توقتالعان بولاتىن. بۇل مىندەتتەر ەلىمىزدىڭ ورنىقتى ەكونوميكالىق دامۋىن قامتاماسىز ەتۋدىڭ نەگىزگى تەتىكتەرىنىڭ ءبىرى رەتىندە ايقىندالدى. بۇگىندە بۇل باعىتتاعى باستامالاردىڭ ناقتى جۇزەگە اسۋ ۇلگىسىن «RG Brands Kazakhstan» كومپانياسىنىڭ قىزمەتىنەن كورۋگە بولادى.
1994 جىلى قۇرىلعان RG Brands Kazakhstan بۇگىندە قازاقستانداعى سۋسىندار, شىرىندار, ءسۇت ونىمدەرى مەن شاي ءوندىرىسىنىڭ جەتەكشى كاسىپورىندارىنىڭ ءبىرى سانالادى. كومپانيا قۇرامىندا بىرنەشە ءىرى وندىرىستىك نىساندار جۇمىس ىستەيدى: الماتىداعى «Tealand» زاۋىتى, قوستاناي قالاسىنداعى «كوسميس» كاسىپورنى جانە الماتى وبلىسىنداعى «اقسەڭگىر» وندىرىستىك-لوگيستيكالىق كەشەنى. 2024 جىلى بۇل تىزىمگە تاعى ءبىر ماڭىزدى جوبا – «اقسەڭگىر-2» زاۋىتى قوسىلدى. ينۆەستيتسيا كولەمى 33 ميلليون اقش دوللارىنان اسقان بۇل جوبا قازاقستاننىڭ دامۋ بانكىنىڭ قولداۋىمەن جۇزەگە استى. بۇل مەملەكەت باسشىسى قويعان ستراتەگيالىق ماقساتتاردىڭ ناقتى ورىندالىپ جاتقانىن كورسەتەتىن ايقىن مىسال.
«ەكسپورتتىق باعىتتا دامۋ ستراتەگياسىن تۇسىنەتىن سەنىمدى سەرىكتەس تابۋ ءبىز ءۇشىن اسا ماڭىزدى بولدى. قازاقستاننىڭ دامۋ بانكى بىزگە تەك قارجىلىق كومەك قانا ەمەس, كەڭەس بەرۋ مەن جۇيەلى قولداۋ تۇرعىسىنان دا ۇلكەن ۇلەس قوستى. سونىڭ ارقاسىندا جوبا ويداعىداي جۇزەگە اسىرىلدى», دەدى RG Brands باسقارما توراعاسى تيمۋر قالتاەۆ.
ونىڭ ايتۋىنشا, بۇگىندە كاسىپورىندا 600-گە جۋىق ادام تۇراقتى جۇمىسپەن قامتىلعان. سونىمەن قاتار زاۋىتتىڭ قىزمەتى وڭىرلىك ەكونوميكاعا مۋلتيپليكاتيۆتى اسەر ەتىپ, تاسىمالداۋ, شيكىزات جانە قاپتاما جەتكىزۋمەن اينالىساتىن سەرىكتەس كومپانيالاردىڭ دامۋىنا دا وڭ ىقپال ەتۋدە. جوبانىڭ باستى ارتىقشىلىقتارىنىڭ ءبىرى – كونسەرۆانتسىز ءونىم شىعارۋعا مۇمكىندىك بەرەتىن جاڭا ىستىق قۇيۋ جەلىسى. بۇل تەحنولوگيا سۋسىنداردىڭ ساپاسىن جاقسارتىپ, ساقتاۋ مەرزىمىن ۇزارتادى, سونداي-اق پلاستيكالىق بوتەلكەلەردىڭ سالماعىن ازايتۋ ارقىلى قورشاعان ورتاعا تۇسەتىن ەكولوگيالىق جۇكتەمەنى تومەندەتۋگە سەپتىگىن تيگىزەدى.
ايتا كەتەيىك, قازاقستاننىڭ دامۋ بانكى مەن RG Brands Kazakhstan اراسىنداعى سەرىكتەستىك 2008 جىلى باستالدى. سول جىلى بانك كومپانياعا سۋسىن شىعاراتىن جاڭا زاۋىتتى سالۋ ءۇشىن ينۆەستيتسيالىق نەسيە بەردى. ودان كەيىن 2016 جىلى بانك كومپانياعا شيكىزات پەن قاپتاما ساتىپ الۋعا ارنالعان قارجىلاندىرۋ ۇسىنعان بولاتىن. ال 2024 جىلى ەكى تاراپ ەلىمىزدەگى العاشقى سينديكاتتالعان نەسيە كەلىسىمىنە قول قويدى. جالپى كولەمى 26,5 ملرد تەڭگەنى قۇراعان بۇل قارجىنىڭ 12,5 ملرد تەڭگەسى وندىرىستىك قۋاتتاردى كەڭەيتۋگە, ال 14 ملرد تەڭگەسى ەكسپورت الدىنداعى قارجىلاندىرۋعا باعىتتالدى. ناتيجەسىندە جاڭا وندىرىستىك جەلىلەر ىسكە قوسىلىپ, ءونىم شىعارۋ مەن ەكسپورت كولەمى ەداۋىر ارتتى.
«بۇل جوبا بانك ميسسياسىنا تولىق سايكەس كەلەدى. ناتيجەسىندە وڭىرلىك ەكونوميكا دامىپ, جاڭا جۇمىس ورىندارى اشىلدى, سالىق تۇسىمدەرى ارتتى جانە ەكسپورتتىق الەۋەت كۇشەيدى», دەپ اتاپ ءوتتى قازاقستاننىڭ دامۋ بانكى كليەنتتەرمەن جۇمىس ديرەكتسياسىنىڭ اعا بانكيرى اسەل شيتەنوۆا. ونىڭ ايتۋىنشا بانك الداعى ۋاقىتتا دا كومپانيانىڭ اينالىم قاراجاتىن تولىقتىرۋ, سونداي-اق تاماق ونەركاسىبىندەگى جاڭا ءوندىرىس جوبالارىن ىسكە اسىرۋ باعىتىندا قولداۋ كورسەتۋگە دايىن.
قازىر RG Brands Kazakhstan ونىمدەرىنىڭ شامامەن 20 پايىزى قىرعىزستان, وزبەكستان, رەسەي, قىتاي جانە تاجىكستان نارىقتارىنا ەكسپورتتالادى. كومپانيا ەكولوگيالىق تۇراقتىلىق قاعيداتتارىن بەرىك ۇستانا وتىرىپ, وندىرىستىك پروتسەستەرگە «جاسىل» تەحنولوگيالاردى بەلسەندى تۇردە ەنگىزىپ كەلەدى. مىسالى, سۋ مەن ەنەرگيا رەسۋرستارىن ۇنەمدەۋ, پلاستيك قولدانۋدى ازايتۋ جانە قالدىقسىز ءوندىرىستى دامىتۋ بويىنشا جۇيەلى جۇمىس جۇرگىزىلۋدە.
RG Brands Kazakhstan تاجىريبەسى – مەملەكەت پەن بيزنەستىڭ سەنىمدى سەرىكتەستىگى ءوندىرىستى جاڭعىرتۋعا, وتاندىق ءونىم ساپاسىن ارتتىرۋعا جانە ەلدىڭ ازىق-ت ۇلىك قاۋىپسىزدىگىن قامتاماسىز ەتۋگە ناقتى ۇلەس قوسا الاتىنىن كورسەتەتىن ايقىن مىسال. قازاقستاننىڭ دامۋ بانكى قولداۋ كورسەتكەن بۇل جوبا ەلىمىزدىڭ ەكسپورتتىق الەۋەتىن ارتتىرىپ قانا قويماي, يننوۆاتسيالىق جانە ەكولوگيالىق تۇرعىدان ءتيىمدى ءوندىرىستىڭ دامۋىنا دا تىڭ سەرپىن بەرىپ وتىر.