قاراعاندى وبلىسىندا سۋمەن جابدىقتاۋ جانە كوممۋنالدىق ينفراقۇرىلىمدى دامىتۋ جوبالارى جۇزەگە اسىرىلىپ جاتىر. ۇكىمەت وسى ماقساتقا ارناۋلى مەملەكەتتىك قوردان 5 ملرد تەڭگەدەن استام قاراجات بولگەن, دەپ جازادى Egemen.kz.
وڭىردە تۇرعىن ءۇي-كوممۋنالدىق شارۋاشىلىق سالاسىندا 9 جوبا جۇزەگە اسىرىلىپ جاتىر. حالىقتى ساپالى اۋىز سۋمەن قامتاماسىز ەتۋ ماقساتىندا ءىرى سۋ قۇبىرلارى مەن ەلدى مەكەندەر ىشىندەگى سۋ قۇبىرى جەلىلەرىنىڭ قۇرىلىسى نازارعا الىنعان.
سولاردىڭ ءبىرى – بيىل مامىر ايىندا قۇبىر تارتۋ جۇمىستارى باستالعان وساكاروۆ اۋدانىنداعى كولحوزنوە اۋىلى. قۇرىلىس جۇمىستارى قاراشا ايىندا اياقتالۋعا ءتيىس. جەلىلەر پايدالانۋعا بەرىلگەننەن كەيىن 400 اۋىل تۇرعىنى ساپالى اۋىز سۋمەن قامتاماسىز ەتىلەدى.
«بىزدە 20 جىلدان استام ۋاقىتتان بەرى سۋ قۇبىرى بولعان جوق. سۋدى ۇڭعىمادان تاسيمىز. ەندى مىنە, بيىل بىزگە جاڭا سۋ قۇبىرىن سالىپ جاتىر. بۇل تۇرمىسىمىزدى ەداۋىر جەڭىلدەتپەك», دەدى اۋىل تۇرعىنى ولگا سانداليدي. سونداي-اق وبلىس ورتالىعىندا سۋمەن جابدىقتاۋ بويىنشا اۋقىمدى جوبالاردى جۇزەگە اسىرۋ جۇمىستارى جالعاسىپ جاتىر. ءىرى جوبالاردىڭ ءبىرى – تەرەشكوۆا اينالىمىنان ەكىنشى ايماقتاعى (شىعىس-5 اۋدانىندا) سورعى ستانساسىنا دەيىنگى سۋ تارتۋ جەلىسىنىڭ قۇرىلىسى. جەلىلەرىنىڭ ۇزىندىعى – 7 شاقىرىم. جاڭا نىسان مايقۇدىق, جاڭا قالا جانە ميحايلوۆكاداعى 200 مىڭنان استام تۇرعىندى تۇراقتى تۇردە اۋىز سۋمەن قامتاماسىز ەتەدى. سونداي-اق قايتارىلعان اكتيۆتەر ەسەبىنەن جاڭا تيحونوۆكا مەن ەسكى تيحونوۆكادا سۋ قۇبىرى جەلىلەرىنىڭ قۇرىلىسى جۇرگىزىلىپ جاتىر. جاڭا تيحونوۆكادا ۇزىندىعى 20 شاقىرىمنان اساتىن جاڭا سۋ قۇبىرى جەلىلەرى تارتىلۋدا. بۇل 4 مىڭعا جۋىق تۇرعىندى ورتالىقتاندىرىلعان سۋ جۇيەسىنە قوسۋعا مۇمكىندىك بەرەدى. ەسكى تيحونوۆكادا 4 شاقىرىمنان استام جەلى تارتۋ جۇمىستارى جۇرگىزىلىپ جاتىر. ناتيجەسىندە 146 ۇيگە سۋ تارتىلادى. قازان ايىنىڭ سوڭىنا دەيىن بارلىق باعىت بويىنشا قۇرىلىس جانە مونتاج جۇمىستارىن تولىق اياقتاۋ جوسپارلانعان. قاراشا ايىندا جەلىلەرگە گيدراۆليكالىق سىناق جاسالىپ, زالالسىزداندىرۋ شارالارى جۇرگىزىلەدى. وسىدان كەيىن تۇرعىندار تەحنيكالىق شارتتاردى الىپ, سۋ جۇيەسىنە قوسىلا الادى. اتالعان جوبالار جۇزەگە اسىرىلعاننان كەيىن قاراعاندىلىقتار 100% اۋىز سۋمەن قامتاماسىز ەتىلەدى. ارناۋلى مەملەكەتتىك قور قاراجاتى ەسەبىنەن سۋ قۇبىرى جەلىلەرى سالىنىپ جاتقان باسقا دا ەلدى مەكەندەر قاتارىندا قارقارالى اۋدانىنىڭ اقتەرەك اۋىلى, تەمىرتاۋ قالاسىنداعى سوتسقالاشىق, وڭ جاعالاۋ, سول جاعالاۋ جانە ەسكى قالا اۋداندارى, اباي اۋدانىنىڭ سادوۆوە اۋىلى, سونداي-اق كوكتەڭكول ستانساسى (№56 رازەزد) جانە شەت اۋدانىنداعى ءاليحان اۋىلى بار. ۇكىمەت بارلىق جۇمىستى جىل سوڭىنا دەيىن اياقتاۋ جوسپارلانعانىن حابارلاپ وتىر.