جىل باسىنان بەرى وبلىس بويىنشا قىلمىستىق قۇقىق بۇزۋشىلىقتاردىڭ تىركەلۋى 1,3 پايىزعا تومەندەگەن. قازىر وڭىردەگى قوعامدىق-ساياسي احۋال تۇراقتى. جالپى قىلمىستىڭ نەگىزگى تۇرلەرى بويىنشا اشىلۋ كورسەتكىشى ءوسىپ وتىر, دەپ حابارلايدى Egemen.kz.
وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى سەرىك توقتىباەۆ وتكەن جىلمەن سالىستىرعاندا بيىل قوعامدىق ورىندار مەن كوشەلەردە جاسالاتىن قۇقىق بۇزۋشىلىقتار سانى ازايعانىن ايتادى. جىل باسىنان بەرى جاستاردىڭ قۇقىقتىق ساۋاتتىلىعىن ارتتىرۋ ماقساتىندا ءبىلىم بەرۋ ۇيىمدارىندا توعىز مىڭنان اسا كەزدەسۋ وتكىزىلىپتى.
«ودان بولەك, «2024 – 2026 جىلدارعا ارنالعان ۇرلىقتارعا قارسى ءىس-قيمىل» باعدارلاماسى اياسىندا بىرقاتار ءتيىستى پروفيلاكتيكالىق شارالار ۇيىمداستىرىلدى. ناتيجەسىندە, بوتەننىڭ مۇلكىن ۇرلاۋ قىلمىسىنىڭ تىركەلۋى 50,5 پايىزعا ازايىپ, اشىلۋى 9,6 پايىزعا جاقساردى. جەدەل-ىزدەستىرۋ ءىس-شارالارى بارىسىندا مال ۇرلىعىمەن اينالىسقان 5 قىلمىستىق توپتىڭ ارەكەتى اشكەرەلەندى. مال ۇرلىقتارىنىڭ الدىن الۋ ماقساتىندا دەپارتامەنت تۇراقتى تۇردە رەيدتىك شارالار جۇرگىزىپ, بەلگىلەنبەگەن ورىنداردا قاراۋسىز جۇرگەن مال يەلەرىنە 851 اكىمشىلىك شارا قولدانىلدى. ۆەتەريناريا قىزمەتكەرلەرىمەن بىرلەسە جاساعان رەيدتەردە جالپى 364 اكىمشىلىك قۇقىق بۇزۋشىلىق تىركەلسە, ونىڭ 279-ى مال نەمەسە ەت ونىمدەرىن زاڭسىز تاسىمالداۋ دەرەكتەرى بولىپ وتىر», دەيدى دەپارتامەنت باستىعىنىڭ ءبىرىنشى ورىنباسارى.
سونىمەن قاتار, 5 000-نان اسا الاياقتىق بەلگىلەرى بار سايتتار مەن سىلتەمەلەر انىقتالىپ, بۇعاتتاۋ ءۇشىن «كيبەرنادزور» جۇيەسىنە ەنگىزىلدى. ەسىرتكى قىلمىسىنا قاتىستى 237 قۇقىق بۇزۋشىلىق انىقتالدى.