اقتاۋداعى ءابىش كەكىلباي ۇلى اتىنداعى ماڭعىستاۋ وبلىستىق تاريحي-ولكەتانۋ مۇراجايىنىڭ الاڭىندا «قازاق ونەرى مەن ادەت-عۇرىپ فەستيۆالى – ۇمىتىلماس ونەر» مادەني ءىس-شاراسى ءوتتى, دەپ حابارلايدى Egemen.kz ماڭعىستاۋ وبلىستىق قوعامدىق كوممۋنيكاتسيا ورتالىعىنا سىلتەمە جاساپ.
ءىس-شارا ماڭعىستاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنىڭ تاپسىرىسى بويىنشا, بىرىڭعاي گرانت وپەراتورى – ازاماتتىق باستامالاردى قولداۋ ورتالىعىنىڭ قولداۋىمەن جانە «التىن ويماق» قولونەردى قولداۋ قوعامدىق قورىنىڭ ۇيىمداستىرۋىمەن «مادەنيەت پەن ونەردى دامىتۋ» جانە «ۇمىتىلماس ونەر» باعىتى اياسىندا جۇزەگە استى.
فەستيۆالدىڭ باستى ماقساتى – ۇلتتىق مادەنيەت پەن ءداستۇرلى قولونەردى ناسيحاتتاۋ, شەبەرلەر اراسىنداعى تاجىريبە الماسۋدى دامىتۋ, جاس ۇرپاقتى ۇلتتىق رۋحتا تاربيەلەۋ جانە قازاقتىڭ قولونەرىن جاڭعىرتۋعا ۇلەس قوسۋ بولدى.
ءىس-شاراعا قالا تۇرعىندارى مەن قوناقتارى, جاستار, كوللەدج ستۋدەنتتەرى, مادەنيەت باسقارماسى مەن مۇراجاي وكىلدەرى, مەملەكەتتىك ورگاندار, بۇقارالىق اقپارات قۇرالدارى, ۇكىمەتتىك ەمەس ۇيىمدار جانە قولونەر شەبەرلەرى قاتىستى.
فەستيۆال باعدارلاماسىندا كيىز ءۇيدى تىگۋ جانە جىعۋ پروتسەسىن كورسەتۋ, ۇلتتىق قولونەر كورمەسى, سانگەرلەر مەن زەرگەرلەردىڭ جۇمىستارىن تانىستىرۋ, شەبەرلىك ساباقتارى, سونداي-اق جاستارعا ارنالعان تانىمدىق ءىس-شارالار ۇيىمداستىرىلدى.
جارىس قورىتىندىسىندا ۇزدىكتەر «ەڭ جاقسى جۇننەن جاسالعان بۇيىم», «ەڭ ۇزدىك توقىما بۇيىمى», «ەڭ جاقسى اعاش بۇيىمى»,«ەڭ جاقسى زەرگەرلىك بۇيىم», «ەڭ جاقسى كەراميكالىق بۇيىم», «ەڭ جاقسى شي», «ەڭ جاقسى كادەسىي», «ەڭ جاقسى ءداستۇرلى قازاق كەستەسى» نوميناتسيالارى بويىنشا انىقتالدى.