استانادا ەلىمىزدەگى تۇڭعىش جوعارى وقۋ ورنى – اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ءبىلىم بەرۋ ينستيتۋتى ءوز جۇمىسىن باستادى. بۇل باستاما پرەزيدەنت قاسىم-جومارت توقاەۆتىڭ ءبىلىم بەرۋ سالاسىن دامىتۋ جونىندەگى ستراتەگيالىق تاپسىرمالارىن جۇزەگە اسىرۋ اياسىندا قولعا الىندى, دەپ حابارلايدى Egemen.kz.
اباي ۋنيۆەرسيتەتىنىڭ جاڭا ءبىلىم بەرۋ ينستيتۋتىنىڭ اشىلۋ راسىمىنە قر عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا, ۋنيۆەرسيتەت رەكتورى بولات تىلەپ, سونداي-اق وقىتۋشىلار مەن ستۋدەنتتەر قاتىستى.
ايتا كەتەيىك, قازىرگى تاڭدا رەسپۋبليكا بويىنشا 70 مىڭنان استام مۇعالىم قاجەت, ال 2025–2035 جىلدار ارالىعىندا بۇل كورسەتكىش 447 مىڭعا دەيىن ارتادى دەپ كۇتىلەدى.وسىنى ەسكەرە وتىرىپ, ەلوردادا اشىلعان اباي ۋنيۆەرسيتەتىنىڭ ءبىلىم بەرۋ ينستيتۋتى جاڭا بۋىن پەداگوگتەرىن دايارلاۋعا باعىتتالعان.
«بۇل ءبىلىم بەرۋ ينستيتۋتىنىڭ اشىلۋى پرەزيدەنت تاپسىرماسى بويىنشا جۇزەگە اسىپ وتىر. بىلتىر اباي اتىنداعى قازۇپۋ جانە ل.گۋميلەۆ اتىنداعى ەۇۋ كونتسورتسيۋمى نەگىزىندە جۇمىستى باستاعانى بەلگىلى. بيىل اباي ۋنيۆەرسيتەتىنىڭ سول ينستيتۋتى جەكە ءوز الدىنا شاڭىراق كوتەردى. وعان عيمارات ءبولىپ, جاعداي جاساعان استانا قالاسىنىڭ اكىمىنە جانە باسى-قاسىندا بولعان اباي ۋنيۆەرسيتەتىنىڭ باسشىلىعىنا زور العىسىمدى بىلدىرەمىن», دەدى سويلەگەن قر عىلىم جانە جوعارى ءبىلىم ۆيتسە-ءمينيسترى گۇلزات ىزباسارقىزى.
مۇندا قازىرگى زامان تالابىنا ساي جابدىقتالعان اۋديتوريالاردا 9 ءبىلىم بەرۋ باعدارلاماسى بويىنشا 400-دەن استام ستۋدەنت وقيدى. ولاردىڭ 288-ءى مەملەكەتتىك گرانت يەگەرى بولسا, 133 ستۋدەنت استانا قالاسى اكىمىنىڭ گرانتى نەگىزىندە ءبىلىم الىپ جاتىر.
ينستيتۋت قۇرامىندا 3 عىلىم دوكتورى, 4 عىلىم كانديداتى, 2 PhD يەگەرى جانە 20-دان استام تاجىريبەلى وقىتۋشى جۇمىس ىستەيدى. ستۋدەنتتەر ماتەماتيكا, ينفورماتيكا, جاراتىلىستانۋ, پسيحولوگيا, دەفەكتولوگيا, لوگوپەديا, تيفلوپەداگوگيكا جانە سۋردوپەداگوگيكا سياقتى جوعارى سۇرانىسقا يە باعىتتار بويىنشا ءبىلىم الادى.
ال ۋنيۆەرسيتەت رەكتورى بولات تىلەپ ستۋدەنتتەرگە ارناعان قۇتتىقتاۋىندا: «سىزدەر پرەزيدەنتتىڭ تىكەلەي تاپسىرماسىمەن دايىندالىپ جاتقان كادر بولعاندىقتان, ەرتەڭگى مەملەكەت بولاشاعىنا قىزمەت ەتەتىن ساپالى مامان بولۋلارىڭىز كەرەك», دەگەن اقجارما تىلەگىن جەتكىزدى.
بۇگىندە اباي ۋنيۆەرسيتەتى مەن استانا قالاسى اكىمدىگى ءوزارا مەموراندۋم نەگىزىندە ىنتىماقتاستىق ورناتقان. وسى كەلىسىم اياسىندا ستۋدەنتتەر ەلوردالىق مەكتەپتەردە تاجىريبەدەن وتەدى. وتكەن جىلى 200-دەن استام ستۋدەنت مۇعالىمدىك تاجىريبەدەن ءساتتى وتكەن. بۇل جوبا الداعى جىلدارى ەلىمىزدىڭ سولتۇستىك ايماقتارىنداعى مۇعالىم تاپشىلىعىن ازايتۋعا ەلەۋلى ۇلەس قوسادى دەپ جوسپارلانعان.