وبلىس ورتالىعى تاراز قالاسىنىڭ اۋماعى كەڭەيگەن سايىن قوعامدىق كولىككە دە سۇرانىس ارتىپ وتىر. تۇرعىنداردىڭ تىلەگىنە نازار اۋدارعان جەرگىلىكتى اتقارۋشى بيلىك اۆتوبۋس پاركىن 90 ورىندىق 24 اۆتوبۋسپەن تولىقتىردى, دەپ حابارلايدى Egemen.kz.
تاراز قالاسى اكىمدىگىنىڭ مالىمەتىنشە, ساتىپ الىنعان اۆتوبۋستاردىڭ 14-ءى №50 مارشرۋتقا قىزمەت كورسەتەدى. بۇل مارشرۋت بايزاق اۋدانىنا قاراستى سارىكەمەر اۋىلىنان باستالىپ, «اۋىل-بەرەكە» بازارى, تولە بي, جامبىل داڭعىلدارى, سۇلەيمەنوۆ, تۇرىسوۆ, شوستاكوۆيچ جانە ب. مومىش ۇلى كوشەلەرىن قامتيدى. اۆتوبۋستاردىڭ قوزعالىس جيىلىگى – 13 مينۋت.
ال قالعان 10 اۆتوبۋس №3 مارشرۋتقا باعىتتالعان. بۇل مارشرۋت شايقورىق, تانتى الاپتارىنان باستالىپ, « ۇلى دالا» شاعىناۋدانى, سۇلەيمەنوۆ, جەلتوقسان, تولە بي, ب. مومىش ۇلى, شوستاكوۆيچ, ساڭىراق باتىر كوشەلەرىن قامتي وتىرىپ, «اراي», «اراي-2» شاعىناۋداندارى مەن «بايتەرەك» شاعىناۋدانىنداعى قالالىق جانە وبلىستىق بالالار اۋرۋحاناسىنا دەيىن قاتىنايدى. بۇل باعىتتا اۆتوبۋستار ءار 12 مينۋت سايىن جۇرەدى.
قازىرگى تاڭدا قالالىق جولاۋشىلار تاسىمالىنا 8 مەكەمە قىزمەت كورسەتىپ وتىر. قوسىمشا باعىتتار اشۋ ناتيجەسىندە مارشرۋتتار سانى 43-تەن 45-كە دەيىن ارتتى. قالاداعى جىلجىمالى قۇرام سانى 492 اۆتوبۋسقا جەتتى.