بۇگىن مەملەكەت باسشىسى قاسىم-جومارت توقاەۆ ءوز ءومىرىن قاتەرگە تىگىپ, ءار كۇنىن ادامزاتتىڭ اماندىعىنا ارنايتىن بەيبىت كۇننىڭ باتىرلارىن اقوردادا قابىلدادى. 19 قازان قۇتقارۋشىلاردىڭ كاسىبي مەرەكەسى قارساڭىندا ءبىر توپ ماماننىڭ ەڭبەگى ەلەنىپ, مەملەكەتتىك ناگرادامەن ماراپاتتالدى, دەپ جازادى Egemen.kz.
ەرلىكپەن ۇشتاسقان ەڭبەگى ەلەنگەندەر اراسىندا توتەنشە جاعدايلار مينيسترلىگى «اپاتتار مەديتسيناسى ورتالىعى» مم شىمكەنت قالاسى بويىنشا فيليالى «قازىعۇرت» تراسسالىق مەديتسينالىق-قۇتقارۋ پۋنكتىنىڭ فەلدشەرى كوبەنوۆ تيمۋر قورعانبەك ۇلى دا بار. 2013 جىلدان بەرى رەسپۋبليكالىق ماڭىزى بار تەرمەز - تاشكەنت - الماتى كۇرە جولىنداعى اپات ورنىنا الدىمەن جەتەتىن كەيىپكەرىمىز كاسىبىنىڭ ءار كۇنى جەدەل ارەكەتتەن تۇراتىنىن تارقاتا ايتتى.
«جول مۇراتى - جەتۋ. دەسە دە جول بويى قاۋىپسىز, توسىن وقيعالاردان ادا ەمەس. سوندىقتان جولاۋشىلار دىتتەگەن جەرىنە جەتە الماي, جول-كولىك وقيعالارى تىركەلىپ جاتادى. سونداي ساتتە زارداپ شەگىپ, ومىرىنە قاۋىپ تونگەندەرگە العاش بولىپ مەديتسينالىق كومەك كورسەتۋگە ءبىز مىندەتتىمىز. ولاردىڭ اۋىرسىنۋى, جاراقاتى ۋشىعىپ, شوكقا ءتۇسىپ قالماۋى ءۇشىن كۇش سالامىز. قاجەتتى كومەك كورسەتىلگەننەن كەيىن ەڭ جاقىن ماڭداعى اۋرۋحانالارعا تاسىمالدايمىز», دەگەن تيمۋر قورعانبەك ۇلى زارداپ شەككەندەردىڭ جاراقاتى مۇگەدەكتىككە اينالماۋى ءۇشىن ەدەل-جەدەل ەتكەن ەڭبەگى اقتالسا, ناۋقاستىڭ جۇرەگى قايتا سوقسا مىندەتىن مۇلتىكسىز اتقارىپ ءجۇرمىن دەپ ەسەپتەيتىنىن اتاپ ءوتتى.
«قاتەلىكتى كەشىرمەيتىن جول ۇستىندە شالت قيمىلداۋعا بولمايدى. ادام تاعدىرى ءبىزدىڭ دۇرىس شەشىمىمىزگە بايلانىپ تۇرادى. 12 جىلدان بەرى وسى مىندەتتى اتقارىپ, ومىرگە ءۇمىت بەرىپ جۇرگەنىم ماراپاتتىڭ تورەسى», دەيدى ول.
وسىلاي ءار سەكۋندتىڭ قىمبات ەكەنىن تەرەڭ ۇعىناتىن مامان بۇگىن «قۇرمەت» وردەنىن كەۋدەسىنە تاقتى. كەيىپكەرىمىز مەملەكەت باسشىسىنىڭ قولىنان العان ماراپات جاۋاپكەرشىلىك جۇگىن ەسەلەي تۇسكەنىن, بۇدان ءارى دە ادامداردىڭ اماندىعى ءۇشىن ادال تەر توگۋگە دايار ەكەنىن باسا ايتتى.