الماتى قالالىق قوعامدىق دەنساۋلىق ساقتاۋ باسقارماسى «حان-ءتاڭىرى» فۋتبول كلۋبىنىڭ ويىنشىسى دياس تولەۋدىڭ اۋرۋحاناعا جەتكىزىلگەن ساتتەگى جاعدايى تۋرالى رەسمي اقپارات تاراتتى, دەپ حابارلايدى Egemen.kz.
قازاقستان چەمپيوناتىنىڭ ءبىرىنشى ليگاسى اياسىندا وتكەن ويىن كەزىندە دياس تولەۋ ءوزىن ناشار سەزىنگەن, سودان كەيىن مەديتسينالىق قىزمەتكەرلەر ونى الاڭنان كوتەرىپ الىپ كەتكەن. اتالعان وقيعادان كەيىن ءۇش ساعات وتكەن سوڭ قازاقستان فۋتبول فەدەراتسياسى دياس تولەۋدىڭ قايتىس بولعانىن حابارلادى.
قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە, سپورتشى الماتى قالالىق ورتالىق كلينيكالىق اۋرۋحاناسىنا كلينيكالىق ءولىم جاعدايىندا جەتكىزىلگەن.
«الماتى قالالىق ورتالىق كلينيكالىق اۋرۋحاناسىنىڭ قابىلداۋ بولىمىنە 2006 جىلى تۋعان پاتسيەنت كلينيكالىق ءولىم جاعدايىندا جەتكىزىلدى. ونى ماتچ كەزىندە كەزەكشىلىكتە بولعان جەكە مەديتسينالىق جەدەل جاردەم كولىگى الىپ كەلگەن. قابىلداۋ كەزىندە جۇرەك سوعىسى مەن قان قىسىمى بولماعان, قاراشىقتارى كەڭەيگەن. مەديتسينالىق بريگادا 30 مينۋت بويى رەانيماتسيالىق شارالار جۇرگىزگەنىمەن, ءومىر بەلگىلەرىن قالپىنا كەلتىرۋ مۇمكىن بولمادى. بيولوگيالىق ءولىم تىركەلدى», دەلىنگەن حابارلامادا.
قازىر مارقۇمنىڭ دەنەسى ءولىمنىڭ ناقتى سەبەبىن انىقتاۋ ماقساتىندا سوت-مەديتسينالىق ساراپتاماعا جىبەرىلگەن.
ايتا كەتەيىك, دياس تولەۋ «حان-ءتاڭىرى» ساپىندا ءبىرىنشى ليگادا ەكى ماۋسىم وتكىزىپ, ءۇش گول سوققان. سونداي-اق «قايرات» فۋتبول اكادەمياسىنىڭ تۇلەگى بولعان.