استانا قالاسىنىڭ №55 ورتا مەكتەبى ەكولوگيالىق مادەنيەتتى دارىپتەۋدىڭ تىڭ ءتاسىلىن ۇسىندى. مەكتەپ ۇجىمى مەن وقۋشىلار «ەكوالەم» باعىتى اياسىندا پلاستيك قاقپاقتاردى جيناپ, ولاردى قايتا وڭدەۋ ارقىلى قازاقستان رەسپۋبليكاسىنىڭ كارتاسىن قۇراستىردى, دەپ حابارلايدى Egemen.kz.
جوباعا باستاماشى بولعان مۇعالىم دانار تولەگەنوۆا بۇل يدەيانىڭ باستى ماقساتى – وقۋشىلاردى تابيعاتتى ايالاۋعا, تۇرمىستىق قالدىقتى قايتا پايدالانۋ داعدىسىنا باۋلۋ ەكەنىن ايتادى. ونىڭ سوزىنشە, جوبا بارىسىندا 5–11 سىنىپتار اراسىندا ارنايى بايقاۋ ۇيىمداستىرىلىپ, ەكولوگيالىق بەلسەندىلىك پەن ۇقىپتىلىققا باۋلۋعا باسا نازار اۋدارىلعان.
اكتسيا ناتيجەسىندە وقۋشىلار بارلىعى 832 پلاستيك قاقپاق جيناعان. سونىڭ 397 داناسى كولەمدى كارتانى جاساۋعا جۇمسالىپ, قالعان بولىگى الداعى ەكولوگيالىق جوبالارعا ساقتالعان.
كارتانى قۇراستىرۋ جۇمىسىنا 5–6 سىنىپتىڭ بەلسەندىلەرى مەن اتا-انالار دا اتسالىسىپ, بىرلەسە ارەكەت ەتۋ ارقىلى ۇجىمدىق جاۋاپكەرشىلىكتىڭ ۇلگىسىن كورسەتكەن.
بوتەلكە قاقپاقتارىنان جاسالعان قازاقستان كارتاسى – جاس ۇرپاقتىڭ تابيعاتتى قورعاۋعا دەگەن نيەتىنىڭ, شىعارماشىلىق ىزدەنىسىنىڭ جانە تۋعان جەرگە دەگەن سۇيىسپەنشىلىگىنىڭ كورىنىسى. بۇل جوبا وقۋشىلاردىڭ ەكولوگيالىق ساناسىنىڭ قالىپتاسىپ كەلە جاتقانىن ايقىن دالەلدەدى.