قاراعاندىلىق سپورتشىلار يتاليادا وتكەن ITF تاەكۆوندو بويىنشا الەم چەمپيوناتىندا جۇلدەلى ونەر كورسەتتى. جاسوسپىرىمدەر, ەرەسەكتەر جانە ارداگەرلەر اراسىنداعى دودادا ولار قازاقستان قۇراماسىنىڭ قورجىنىنا 21 مەدال سالدى. ناتيجە: 3 التىن, 6 كۇمىس جانە 12 قولا, دەپ حابارلايدى Egemen.kz.
بايراقتى باسەكەگە 69 ەلدەن 1200-دەن استام سپورتشى قاتىسىپ, قازاقستان نامىسىن 72 تاەكۆوندوشى قورعادى. ونىڭ ىشىندە 16 سپورتشى – قاراعاندى وبلىسىنان. جەرلەستەر جەكەلەي جانە كوماندالىق سپاررينگ, فورمالدى جاتتىعۋلار, ءوزىن-ءوزى قورعاۋ, ارنايى تەحنيكا بويىنشا سىنعا ءتۇستى.
ارداگەرلەر ساناتىندا (45–59 جاس) ءاليا سۇلەيمەنوۆا فورمالدى جاتتىعۋدا قولا, ال سپاررينگ بويىنشا التىن مەدال جەڭىپ الىپ, ءۇش دۇركىن الەم چەمپيونى اتاندى. سونداي-اق ارداگەرلەر مارلەن شالتاكوۆ, دۋلات قۇرمانسەيىتوۆ جانە ازامات ءسابيتوۆ جالپى 6 مەدال يەلەندى: 1 التىن, 3 كۇمىس جانە 2 قولا. مەدينا داۋلەنوۆا قاراعاندى ITF تاەكۆوندو فەدەراتسياسى تاريحىندا ايەلدەر اراسىنداعى العاشقى الەم چەمپيونى اتانىپ, ەكىنشى التىندى ەنشىلەدى. ءۇشىنشى التىندى 14–15 جاس ارالىعىنداعى ايتۋار سايرانوۆ جەڭىپ الدى.
قاراعاندى وبلىسى