سوت اقسۋ قالاسى قۇرىلىس ءبولىمىنىڭ بۇرىنعى باسشىسى مەن كاسىپكەردى 7 جىلعا باس بوستاندىعىنان ايىردى, دەپ حابارلايدى Egemen.kz.
2024 جىلى اقسۋ قالاسىنىڭ پروكۋراتۋراسى ءتورت دەنە شىنىقتىرۋ-ساۋىقتىرۋ كەشەنىنىڭ قۇرىلىسى بويىنشا ورىندالعان جۇمىستار اكتىلەرىنە زاڭسىز قول قويىلعانىن انىقتاعان. الدىن الا تەرگەۋ بارىسىندا ارنايى پروكۋرورلار مەملەكەتكە 290 ميلليون تەڭگەدەن استام شىعىن كەلتىرىلگەنىن انىقتادى.
وڭىرلىك پروكۋراتۋرادان حابارلاعانداي, اقسۋ قالاسىنىڭ مامانداندىرىلعان اۋدانارالىق سوتى اسا ءىرى كولەمدەگى بيۋدجەت قاراجاتىن تالان-تاراجعا سالۋ ءىسى بويىنشا ۇكىم شىعاردى.
- ايىپتالۋشىلار قاتارىندا اقسۋ قالاسى قۇرىلىس ءبولىمىنىڭ بۇرىنعى باسشىسى مەن مەردىگەر كومپانيا وكىلى بار. ەكەۋى دە 7 جىل باس بوستاندىعىنان ايىرىلدى. بۇل سوت پروتسەسى كورسەتىلىمدىك سيپاتقا يە بولىپ, وعان مەملەكەتتىك ورگانداردىڭ باسشىلارى قاتىستى, - دەپ حابارلادى پروكۋراتۋرادان.
ۇكىم زاڭدى كۇشىنە ەنگەن جوق.
پاۆلودار وبلىسى