باق پەن الەۋمەتتىك جەلىلەردە Telegram مەسسەندجەرىنىڭ نەگىزىن قالاۋشى پاۆەل دۋروۆتىڭ الماتى وبلىسىنداعى «كولساي كولدەرى» ۇلتتىق پاركىندە شومىلىپ جۇرگەن ءساتى تۇسىرىلگەن بەينەجازبا جاريالاندى, دەپ حابارلايدى Egemen.kz ەكولوگيا جانە تابيعي رەسۋرستار مينيسترلىگىنىڭ ءباسپاسوز قىزمەتىنە سىلتەمە جاساپ.
«اتالعان دەرەك بويىنشا قىزمەتتىك تەكسەرىس جۇرگىزىلىپ, كولساي-2 كولىنىڭ ماڭىندا شومىلۋعا تىيىم سالىنعانى تۋرالى ەسكەرتۋ بەلگىلەرى بولماعانى انىقتالدى. سول سەبەپتى بۇل ارەكەتتە قۇقىق بۇزۋشىلىق بەلگىلەرى جوق.
كەزدەيسوق ورىن العان جاعداي اۋماقتىڭ ەكولوگيالىق تۇراقتىلىعىنا اسەر ەتپەگەن», دەلىنگەن مينيسترلىك مالىمەتىندە.
اتالعان وقيعا ەرەكشە قورعالاتىن تابيعي اۋماقتاردا بولۋ ەرەجەلەرى تۋرالى تۋريستەردى جۇيەلى تۇردە حاباردار ەتۋدىڭ ماڭىزدىلىعىن كورسەتتى. بۇل ءوز كەزەگىندە قازاقستاننىڭ بىرەگەي تابيعاتىن ساقتاۋعا, سونداي-اق ەلدىڭ ەكو جانە جاۋاپتى تۋريزم باعىتىنداعى تارتىمدىلىعىن ارتتىرۋعا مۇمكىندىك بەرەدى.
سونىمەن قاتار پاۆەل دۋروۆتىڭ 10 ميلليوننان استام جازىلۋشىسى بار جەكە پاراقشاسىندا جاريالانعان بەينەماتەريال يميدجدىك سيپاتقا يە, قازاقستاننىڭ تابيعي سۇلۋلىعىن حالىقارالىق اۋديتورياعا پاش ەتتى. مۇنداي اقپاراتتىق قامتۋ ەلدىڭ تۋريستىك الەۋەتىن جاقسارتۋعا قوسىلعان ەلەۋلى ۇلەس.