ۇلت رۋحانياتىنىڭ ۇلى تۇلعاسى, حالىق قاھارمانى, ايگىلى كومپوزيتور, كۇيشى ءارى ديريجەر نۇرعيسا تىلەنديەۆتىڭ كىندىكقانى تامعان اۋىلىندا دەمەۋشىلەردىڭ قولداۋىمەن ەڭسەلى ستەللا بوي كوتەردى. ارحيتەكتۋرالىق تۇرعىدان ەرەكشە پىشىنگە يە بۇل ەسكەرتكىشتە قازاقتىڭ قاسيەتتى دومبىراسى مەن سۇلۋلىقتىڭ سيمۆولى سانالاتىن قوس اققۋ بەينەلەنگەن, دەپ حابارلايدى Egemen.kz.
ستەللانىڭ سالتاناتتى اشىلۋ راسىمىنە الماتى وبلىسى اكىمىنىڭ ورىنباسارى عاني مايلىباەۆ قاتىسىپ, اۋىل تۇرعىندارىن قۋانىشتارىمەن قۇتتىقتادى. شاراعا سونداي-اق تۇركسوي جازۋشىلار وداعىنىڭ توراعاسى, اقىن ۇلىقبەك ەسداۋلەت, وبلىستىق ارداگەرلەر كەڭەسىنىڭ توراعاسى ەربولات تۇرىمبەتوۆ, ىلە اۋدانىنىڭ اكىمى قايىرجان جاقسىمبەتوۆ جانە اۋىل تۇرعىندارى, زيالى قاۋىم وكىلدەرى قاتىستى.
ء«بىز ۇلى تۇلعالاردىڭ ەڭبەگىن دارىپتەي وتىرىپ, ۇرپاعىمىزدى ونەرگە, بىلىمگە, ەلدىككە تاربيەلەيمىز. شوقتىعى بيىك كومپوزيتوردىڭ مۇراسى حالقىمىزدىڭ جۇرەگىندە ماڭگىلىك ساقتالىپ, ۇرپاققا مۇرا بولىپ جالعاسا بەرەتىن بولادى», – دەگەن ۇلىقبەك ەسداۋلەت ستەللانىڭ بوي كوتەرۋىنە اتسالىسقان اتىمتاي جومارت جاندارعا العىسىن ءبىلدىردى.
كۇي قالىقتاعان ءىس-شارا سوڭىندا ستەللا ورناتىلعان الاڭعا اعاش كوشەتتەرى وتىرعىزدى.
ەسكە سالساق, بۇعان دەيىن الماتى وبلىسىندا نۇرعيسا تىلەنديەۆتىڭ 100 جىلدىق مەرەيتويىنا وراي ەسكەرتكىش پەن مادەنيەت ءۇيى اشىلعان بولاتىن. سونداي-اق ءوڭىردىڭ ونەرپازدارى مەن قولونەر شەبەرلەرى ۇلى كومپوزيتوردىڭ مەرەيتويىنا ارنالعان ءىس-شارالار اياسىندا پەكين, بىشكەك جانە ماسكەۋ قالالارىندا قازاقستان مادەنيەتىن جوعارى دەڭگەيدە تانىستىردى.
جالپى, نۇرعيسا تىلەنديەۆتىڭ يۋنەسكو كولەمىندە اتالىپ جاتقان 100 جىلدىق مەرەيتويى اياسىندا جىل باسىنان بەرى رەسپۋبليكالىق جانە حالىقارالىق دەڭگەيدەگى مادەني ءىس-شارالار جۇيەلى تۇردە ۇيىمداستىرىلىپ كەلەدى.
الماتى وبلىسى.