اكىم سايلاۋىنا ازىرلىك

ايتۋلى ناۋقانعا ازىرلىكتى كورۋ ءۇشىن شاھارعا ورتالىق سايلاۋ كوميسسياسىنىڭ توراعاسى نۇرلان ءابدىروۆتىڭ ءوزى كەلدى. توراعا بۇل جۇمىس ساپارىنىڭ ماقساتى سايلاۋ زاڭعا ساي ءادىل ءوتۋ ءۇشىن مامانداردىڭ ازىرلىگىن قاداعالاپ, جالپى كوپشى­لىك­كە ءتۇسىندىرۋ جۇمىستارىن جۇر­­گىزۋ جانە جاستارمەن كەزدەسۋ وتكىزۋ ەكەنىن ايتتى. وسىلايشا, ن.ءابدىروۆتىڭ توراعالىعىمەن سەمەي قالاسى اكىمىن سايلاۋعا دايىندىق جانە ونى وتكىزۋ ماسەلەلەرى جونىندە مەملەكەتتىك ورگانداردىڭ باسشىلارى قاتىسقان ارنايى جيىن ءوتتى. جيىندا جەرگىلىكتى رەسمي ماماندار قالادا قازىر 200 مىڭنان اسا سايلاۋشى بارىن, سايلاۋدى وتكىزۋگە 128 ۋچاسكەلىك كوميسسيادا 929 ادام جۇمىس ىستەيتىنىن باياندادى.

– سەمەي قالاسى اكىمىن سايلاۋ ناۋقانىن وتكىزۋ بارىسىندا بارلىق 128 سايلاۋ بولىمشەسى قاجەتتى ماتەريالدىق-تەحنيكالىق قۇرالدارمەن قامتاماسىز ەتىل­گەن جانە سايلاۋ وتكىزۋگە ءازىر. بولىمشەلەر تالاپتارىنا ساي, ونىڭ ىشىندە مۇگەدەكتىگى بار ازاماتتارعا جاعداي قاراستىرىلعان. بولۋى مۇمكىن داۋلى جاعدايلارعا جەدەل ارەكەت ەتۋ ماقساتىندا شتاب قۇرىلدى. جەدەل شتاب مۇشەلەرى قوعامدىق-ساياسي جاعدايعا كۇندەلىكتى مونيتورينگ جۇرگىزىپ وتىر, سايلاۋ كۇنى كوممۋنالدىق كاسىپورىنداردا, تۇكش, جولاۋشىلار كولىگى جانە اۆتوموبيل جولدارى بولىمدەرىندە جاۋاپتى تۇلعالاردىڭ كۇشەيتىلگەن كەزەكشىلىگى جۇزەگە اسىرىلادى, – دەيدى سەمەي قالاسى اكىمى اپپاراتىنىڭ باسشىسى ەركەن بەركەنوۆ.

ورتالىق سايلاۋ كوميسسياسىنىڭ توراعاسى ەلىمىزدە سايلاۋ قالاي وتەتىنىن جاستارعا دا ءتۇسىندىرىپ, وزگە دە مەملەكەتتەردىڭ ۇلگىسىن مىسالعا كەل­تىردى. ول دەموكراتيا مەن حالىق داۋى­سىن ءبىلدىرۋدىڭ ماڭىزىنا توق­تا­لىپ, جاستاردىڭ سۇراقتارىنا جاۋاپ بەردى.

– بىزگە كورشىلەس, باۋىرلاس وزبەكستان بىلتىر ءوز رەفورمالارىن وتكىزدى. ەندى ولار اۋدان, اۋىل اكىمدەرىن سايلاماقشى. بىراق ولاردا سايلايتىن – بىزشە ءماسليحات دەپۋتاتتارى. بىزدە ولاي ەمەس, بىزدە تىكەلەي حالىق سايلاپ وتىر. سوندىقتان حالىق سايلاۋدا بەلسەندى بولۋعا ءتيىس, – دەدى وسك توراعاسى.

اۋماقتىق سايلاۋ كوميسسياسىنا ءتورت ۇمىتكەر تىركەلگەن. ولار – ايبولات بەكجاساروۆ, ادىلەت قوجانباەۆ, قۋانىش تولەۋوۆ, قانات شاپاتوۆ. تىركەلگەن كاندي­دات­تارعا ءوز باعدارلامالارىن ساي­لاۋشىلارعا تانىستىرۋ ءۇشىن 11 قازان, تۇنگى ساعات 12.00-گە دەيىن ۋاقىت بەرىلدى. ودان كەيىن زاڭعا سايكەس كەز كەلگەن ۇگىت-ناسيحاتقا تىيىم سالىنعان.

بۇدان سوڭ 26 قازاندا ايماقتا ءماسليحات دەپۋتاتتارىنىڭ بوساعان ورىندارىنا سايلاۋ وتەدى. بۇل ەلى­مىزدىڭ 16 ايماعىنا قاتىستى. ال اباي وبلىسىندا ءماسليحات دەپۋتات­تا­رىن سايلاۋ اقسۋات, جارما, بورودۋليحا, ماقانشى اۋداندارىندا بولادى.

اباي وبلىسى