العا اۋدانىنىڭ مارجانبۇلاق اۋىلىندا جاڭا دارىگەرلىك امبۋلاتوريا پايدالانۋعا بەرىلدى. ءبىر اۋىسىمدا 45 تۇرعىندى قابىلداۋعا لايىقتالعان ەمدەۋ مەكەمەسى مەملەكەت باسشىسىنىڭ اۋىلدىق ينفراقۇرىلىمدى دامىتۋ جونىندەگى تاپسىرماسىن ورىنداۋ اياسىندا سالىندى.
نىسان قۇرىلىسىنا ارناۋلى مەملەكەتتىك قوردان شامامەن 190 ملن تەڭگە قارجى بولىنگەن. زاماناۋي قۇرال-جابدىقتارمەن قامتاماسىز ەتىلگەن عيماراتتا ەمدىك كابينەتتەر, العاشقى جاردەم كورسەتەتىن جانە زەرتحانا بولمەسى بار. قازىردە ەمدەۋ مەكەمەسىنە جالپى تاجىريبەدەگى دارىگەر, فەلدشەر مەن بىرنەشە مەدبيكە جۇمىسقا قابىلداندى. اقتوبە قالاسىنان 55 شاقىرىم قاشىقتىقتا ورنالاسقان مارجانبۇلاق ەلدى مەكەنىندە ءتورت مىڭعا جۋىق ادام تۇرادى. رەسپۋبليكالىق ماڭىزى بار اۆتوكولىك جولىنا جاقىن ورنالاسقان وسى اۋىلعا جىل سايىن قونىس اۋدارۋشىلار كوبەيىپ كەلەدى. جۇرت اقتوبە قالاسىنا نە العاعا قاتىناپ دارىگەرگە كورىنۋدىڭ قيىندىعىن ايتىپ, مارجانبۇلاقتان ەم-دوم جۇرگىزەتىن مەكەمە سالىنۋىن كوپتەن ۇسىنىس ەتىپ جۇرگەن. ايتا كەتۋ كەرەك, العا اۋدانىندا 44 مىڭعا جۋىق ادام تۇرادى. وتىز ەلدى مەكەنى بار.
«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا بۇگىندە اقتوبە وبلىسىندا جۇزەگە اسىرىلىپ جاتقان 11 ەمدەۋ مەكەمەسىنىڭ كوپشىلىگى شالعاي اۋىلدارداعى دارىگەرلىك امبۋلاتوريالار. بيىلدىڭ وزىندە ءتورت ەمدەۋ مەكەمەسى پايدالانۋعا بەرىلسە, جەتى قۇرىلىس اياقتالۋعا جاقىن. وسىدان بىرەر اي بۇرىن ىرعىز اۋدانى جارما اۋىلى مەن بايعانين اۋدانى نوعايتى اۋىلىندا ەمدەۋ مەكەمەلەرى جۇمىس ىستەي باستادى. جىل اياعىنا دەيىن جاڭا نىسانداردى ىسكە قوسۋ جۇمىسى جالعاسادى.
اقتوبە وبلىسى