• RUB:
    6.68
  • USD:
    520.93
  • EUR:
    609.07
باستى سايتقا ءوتۋ
الماتى 08 قازان, 2025

باعاناشىلداعى بالالار ءۇيىنىڭ تاربيەلەنۋشىلەرى جوندەۋ جۇمىستارى كەزىندە قايدا بارادى؟

40 رەت
كورسەتىلدى

بيىل قوعامنىڭ ءبىراز نارازىلىعى مەن تۇسىنىسپەۋشىلىگىن تۋىنداتقان الماتىداعى باعاناشىل ىقشام اۋدانىندا ورنالاسقان №2 بالالاردى قولداۋ ورتالىعىنىڭ عيماراتىن قايتا جوندەۋ جۇمىستارى جوسپارلانىپ جاتقانى ايان. جاڭعىرتۋ جۇمىستارى كەزىندە بالالار ۋاقىتشا №1 مەكتەپ-ينتەرناتقا ورنالاستىرىلاتىن بولدى, دەپ جازادى Egemen.kz.

بۇگىندە №2 بالالاردى قولداۋ ورتالىعىندا 100 تاربيەلەنۋشى بار, ولاردىڭ 13-ءى – مەكتەپكە دەيىنگى جاستا, 87-ءسى – مەكتەپ وقۋشىلارى. بۇعان دەيىن باق-تا بالالاردى وبلىسقا كوشىرۋ ماسەلەسى تالقىلانعان بولاتىن, بارلىق تاربيەلەنۋشىلەردىڭ الماتىدا قالاتىنى جونىندە شەشىم قابىلداندى.

«پرەزيدەنت تاپسىرماسىنا سايكەس ورتالىق عيماراتى تولىق جوندەۋدەن وتەدى. «ينتەگرا» جشس الەۋمەتتىك جاۋاپكەرشىلىك اياسىندا بۇل مىندەتتەمەنى ءوز موينىنا الىپ, بالالاردى كوشىرۋگە دايىن», – دەيدى ازامات قالدىبەكوۆ.

بالالاردى ورنالاستىرۋ ماسەلەسى قالالىق ءبىلىم باسقارماسىنىڭ باقىلاۋىندا. باسقارما باسشىسى سايران سايفەدەنوۆتىڭ ايتۋىنشا, ۋچاسكە اۋماعىندا ەسكى نىساندى بۇزىپ, جاڭا عيمارات سالۋدى كوزدەيتىن جوبالىق-سمەتالىق قۇجاتتاما ازىرلەنۋدە.

«بالالاردى ءبىلىم باسقارماسىنا قاراستى №1 مەكتەپ-ينتەرناتقا كوشىرۋ ماسەلەسى شەشىلدى. ەكى اپتا بۇرىن بۇل ينتەرناتتا «جانۇيا» ارنايى ءۇيىنىڭ 90-نان استام تاربيەلەنۋشىسى تۇرعان بولاتىن. جالپى اۋماعى 1 113,1 شارشى مەتر, 18 بولمەدەن تۇراتىن عيماراتتا اعىمداعى جوندەۋ جۇمىستارى جۇرگىزىلدى. اپتا سوڭىنا قاراي بالالار كوشىپ, ورتالىق بوساتىلعاننان كەيىن قۇرىلىس كومپانياسى جوندەۋ جۇمىستارىنا كىرىسەدى», – دەد. الماتى قالاسى اكىمىنىڭ ورىنباسارى سايران سايفەدەنوۆ.

قازىرگى ۋاقىتتا قالادا ەرەكشە ءبىلىم بەرۋ قاجەتتىلىگى بار بالالارعا ارنالعان 8 ارنايى مەكتەپ-ينتەرنات جۇمىس ىستەيدى. وندا 2 668 وقۋشى ءبىلىم الىپ جاتىر (ونىڭ ىشىندە 1 794-ءى ينتەرناتتا, 874-ءى ۇيدە وقىتىلادى). سونىمەن قاتار تاعدىر تالكەگىنە تاپ بولعان كامەلەتكە تولماعاندارعا كومەك كورسەتەتىن 4 ۇيىم قىزمەت اتقارىپ كەلەدى. بۇل مەكەمەلەردە بارلىعى 446 بالا تاربيەلەنىپ وتىر.

سونداي-اق, 2025 جىلعى 20 قىركۇيەكتە الماتىدا قۇرىلىس كومپانياسى BI Group قاراجاتى ەسەبىنەن (6 ملرد تەڭگە كولەمىندە) سالىنعان جاڭا «جانۇيا» ارناۋلى كەشەنى اشىلعانى اتاپ ءوتىلدى. بۇل جوبا الەۋمەتتىك ماسەلەلەردى شەشۋدە مەملەكەت پەن بيزنەس ءتيىمدى جۇمىس ىستەي الاتىنىنا مىسال بولادى.

سوڭعى جاڭالىقتار