بۇگىن ءماجىلىستىڭ جالپى وتىرىسىندا قۇرىلىس كودەكسىنىڭ جوباسى جونىندە ونەركاسىپ جانە قۇرىلىس ءمينيسترى ەرسايىن ناعاسپاەۆ بايانداما جاسادى, دەپ جازادى Egemen.kz.
قر ازاماتتىق كودەكسىندە جاڭادان سالىنعان عيماراتقا كەپىلدىك مەرزىمى - 10 جىل, سالالىق كودەكستە - 2 جىلدان كەم بولماۋ كەرەك دەلىنگەن. مينيستر بۇل مەرزىمدى 5 جىلعا دەيىن ۇزارتۋ كوزدەلىپ وتىرعانىن اتاپ ءوتتى.
دەسە دە ءماجىلىس دەپۋتاتى مارحابات جايىمبەتوۆ بۇل مەرزىمنىڭ دە جەتكىلىكسىز ەكەنىن ايتىپ, سالدارىنا توقتالدى.
«قۇرىلىس كومپانيالارى وسىنى پايدالانىپ, ەكى جىلدىق كەلىسىمشارتقا وتىرادى. ال ەكى جىلدىڭ ىشىندە عيماراتتىڭ سىرتى ءبۇتىن, ءىشى ءتۇزۋ كورىنگەنىمەن, ۋاقىت وتە كەلە اقاۋلار پايدا بولىپ, اۆاريالىق جاعدايعا جەتىپ جاتىر. ءۇش جىلدان كەيىن قۇلاپ جاتقان مەكتەپتەر, قاسبەتتەردىڭ قۇلاپ, ءسال جەل تۇرسا شاتىرلاردىڭ ۇشىپ جاتقانىن كورىپ ءجۇرمىز. سوندىقتان ەكى جىلدىق كەپىلدىك – جۇمىس ىستەپ كەتسەك بولدى دەگەن تۇسىنىكتىڭ تۋىندىسى. ونىڭ سالدارى - سۋىق اۋرۋحانالار, توبەسىنەن جاڭبىر تامشىلاعان - مەكتەپتەر. ءبىز ءبىر توپ دەپۋتات ۇسىنىس جاساعانبىز. ىرگەتاسقا, قاسبەتكە, شاتىرعا, تىرەك قابىرعالارىنا كەپىلدىك 10 جىل بولۋ كەرەك. باسقا ەلەمەنتتەرگە 5 جىل بولا بەرسىن», دەدى دەپۋتات.
ءوز كەزەگىندە ەرسايىن ناعاسپاەۆ دەپۋتاتتىڭ سوزىمەن كەلىسىپ, ۇسىنىس ءالى دە پىسىقتالاتىنىن ايتتى.
«شىنىمەن دە قازىرگى ەكى جىلدىق كەپىلدىك قۇرىلىستا دەفەكت شىققان كەزدە قيىندىقتار تۋىنداتادى. سوندىقتان ءبىز قۇرىلىس كومپانيالارىنىڭ جاۋاپكەرشىلىگىن كۇشەيتۋ ءۇشىن كەپىلدىك مەرزىمىن كەمىندە 5 جىلعا دەيىن ۇزارتۋدى ۇسىنىپ وتىرمىز. ال ءسىز اتاعان ەلەمەنتتەرگە 10 جىلدىق كەپىلدىك ەنگىزۋ ماسەلەسىن پىسىقتاپ جاتىرمىز. جالپى ءبىز بۇل باستامانى قولدايمىز», دەدى ونەركاسىپ جانە قۇرىلىس ءمينيسترى.