ۇلتتىق بانك 2025 جىلدىڭ العاشقى جارتى جىلىنداعى تولەم جۇيەسىنە قاتىستى ەسەپ جاريالادى. ەسەپتە وتانداستارىمىزدىڭ قالاي جانە قايدا اقشا اۋداراتىنى, بانك قىزمەتتەرىن قانشالىقتى پايدالاناتىنى تۋرالى مالىمەت بەرىلگەن, دەپ جازادى Egemen.kz.
1 مىڭ ادامعا 97 POS-تەرمينال
بيىل ەلدە 910 مىڭنان استام كاسىپكەرگە تيەسىلى 1,146 ملن ساۋدا ورنىندا 1,357 ملن POS-تەرمينال جۇمىس ىستەپ تۇر. بۇل وتكەن جىلمەن سالىستىرعاندا 17%-عا كوپ. قازىر 1 مىڭ ادامعا 97 تەرمينالدان كەلەدى. بىلتىر بۇل كورسەتكىش 84 بولعان. ەڭ كوپ تەرمينال الماتىدا, استانادا جانە قاراعاندى وبلىسىندا ورنالاسقان. ءۇش ءوڭىر ەلدەگى بارلىق تەرمينالدىڭ 40%-ىن قامتيدى.
ءار وتانداسىمىزدىڭ ءتورت بانك كارتاسى بار
ونلاين-بانكينگ قولدانۋشىلار سانى 12%-عا ءوسىپ, 27,1 ملن ادامعا جەتتى. ەلدە بارلىعى 81,7 ملن تولەم كارتاسى بار. سونىڭ 41,3 ميلليونى – بەلسەندى, ياعني ايىنا كەم دەگەندە ءبىر رەت پايدالانىلادى. دەمەك ءاربىر وتانداسىمىزدىڭ ورتا ەسەپپەن ءتورت كارتاسى بار, ونىڭ ەكەۋى ۇنەمى قولدانىستا.
قولما-قول اقشا شەشۋ ازايىپ جاتىر
2025 جىلدىڭ ءبىرىنشى جارتى جىلدىعىندا حالىق 6,8 ملرد تولەم مەن اۋدارىم جاسادى. بارلىعىنىڭ سوماسى – 100,7 ترلن تەڭگە. بۇل وتكەن جىلمەن سالىستىرعاندا سانى بويىنشا 12%, ال كولەمى بويىنشا 19%-عا كوپ. بارلىق وپەراتسيانىڭ 98%-ى قولما-قول ەمەس. ال اقشا شەشۋ سانى 4%-عا ازايعان, بىراق كولەمى 9%-عا ارتقان. ورتاشا چەك 112 مىڭ تەڭگە بولعان (بىلتىر 98 مىڭ تەڭگە ەدى).
حالىقارالىق اقشا اۋدارىمدارى ازايدى
2025 جىلدىڭ العاشقى جارتىسىندا حالىقارالىق جۇيەلەر ارقىلى 854,8 مىڭ اقشا اۋدارىمى جاسالدى. بارلىعىنىڭ سوماسى – 337,8 ملرد تەڭگە. بۇل بىلتىرعىدان 14,5%-عا از. شەتەلگە كەتكەن اقشا كولەمى 321,2 ملرد تەڭگە بولدى, ياعني 16%-عا تومەندەدى.
اۋدارىمداردىڭ 80%-ى «زولوتايا كورونا» مەن «Western Union» ارقىلى جۇرگىزىلدى. ال شەتەلدەن كەلگەن قاراجاتتىڭ 99,9%-ى تەگىن (قايتارىمسىز) اۋدارىمدار بولعان.
ازاماتتارىمىز اقشانى كوبىنە قاي ەلدەرگە جىبەرەدى
ەلىمىزدەن ەڭ كوپ اقشا رەسەيگە (31,7%), وزبەكستانعا (29,7%), تۇركياعا (18,2%), گرۋزياعا (6%) جانە قىرعىزستانعا (3,3%) اۋدارىلادى. ءبىر شەتەلدىك اۋدارىمنىڭ ورتاشا سوماسى – 398,9 مىڭ تەڭگە.
قازاقستانعا كەلگەن اقشا كولەمى 12,5%-عا ازايعان. ەلگە 304,9 مىڭ اۋدارىم جاسالىپ, جالپى سوماسى 105,4 ملرد تەڭگە بولعان. اقشا ەڭ كوپ رەسەيدەن (24%), اقش-تان (14,9%), وزبەكستاننان (10,3%), تۇركيادان (9,5%) جانە گەرمانيادان (7,7%) كەلگەن. ءبىر اۋدارىمنىڭ ورتاشا سوماسى – 345,6 مىڭ تەڭگە.