استانادا وتكەن دجەننيفەر لوپەستىڭ كونتسەرتىنە 12 مىڭ شەتەلدىك قوناق كەلگەن. بۇل تۋرالى قالانىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى حالەل اكىمجانوۆ ايتتى, دەپ حابارلايدى Egemen.kz.
بيىل التى ايدا استاناعا 735 مىڭ تۋريست كەلگەن. ونىڭ 177 مىڭى شەتەلدەن.
«بىلتىرمەن سالىستىرعاندا تۋريستەر سانى 13%-عا ءوستى. قالادا ءتۇرلى كونتسەرتتەر مەن شارالار ءوتىپ جاتىر. مىسالى, دجەننيفەر لوپەستىڭ كونتسەرتىنە 12 مىڭ, ال Backstreet Boys كونتسەرتىنە 15 مىڭ شەتەلدىك كەلدى», دەدى ح. اكىمجانوۆ.
ونىڭ ايتۋىنشا, دجەننيفەر لوپەستىڭ كونتسەرتى قالا ەكونوميكاسىنا ۇلكەن پايدا اكەلدى. ۇيىمداستىرۋشىلاردان 600-800 ملن تەڭگە سالىق تۇسكەن.
«قوناقۇي مەن مەيرامحانالاردان تۇسكەن تابىس جىل سوڭىندا ەسەپتەلەدى. الدىن الا ەسەپ بويىنشا, كونتسەرتتەن 4 ملرد تەڭگەدەن استام پايدا ءتۇستى. Backstreet Boys كونتسەرتى بويىنشا ەسەپتەۋ ءجۇرىپ جاتىر», دەدى باسقارما باسشىسى.
سونداي-اق ول جىل سايىن قالاعا كەلەتىن تۋريست سانى 13-15%-عا ءوسىپ جاتقانىن ايتتى.
ايتا كەتەيىك, دجەننيفەر لوپەس الماتىدا دا كونتسەرت بەردى. ورتالىق ستاديوندا وتكەن كونتسەرتكە 27 مىڭ ادام جينالدى. ونىڭ ىشىندە 35 ەلدەن كەلگەن 7 مىڭ شەتەلدىك بولعان. الماتى اكىمدىگىنىڭ مالىمەتىنشە, كونتسەرتتەن تۇسكەن تابىس 10 ملرد تەڭگەدەن اسىپ, 600 ملن تەڭگە سالىق تولەنگەن.