استانانىڭ كۇزى كەيدە ەسەنعالي راۋشانوۆتىڭ جىرلارىنا ۇقساپ كەتەدى. سەلەۋدەي سارعايىپ كورىسەدى دە, قاۋلاعان وتتاي كۇرەڭىتىپ, جالقىنى تالاۋراپ, سونبەي جاتىپ الادى. «جاڭا جىل كۇزدەن باستالۋ كەرەك مەنىڭشە» دەگەن اقىن نەگە بۇلاي جىرلاعانى سوندا بايقالاتىنداي. شايىردى ەسكە الۋعا ارنالعان «ۇشتى مەنىڭ قۇستارىم بۇلتتان ءارى» اتتى پوەتيكالىق كەش ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىندە ءوتىپ, قازاق ادەبيەتىنىڭ كلاسسيگى تۋرالى ءبىرسىپىرا ەستەلىك ايتىلىپ, ولەڭدەرى وقىلىپ, اندەرى شىرقالدى.
كەش تەاتر انشىلەرى حورمەن سالعان «قارا باۋىر قاسقالداق» انىمەن اشىلدى. تىزگىنشى – اقىن, جازۋشىلار وداعى استانا فيليالىنىڭ جەتەكشىسى باۋىرجان باباجان ۇلى ەساعاڭ تۋرالى ەستەلىكتەردى قاباتتاپ وتىردى. ۇلت ادەبيەتىنە ۇلى تۋىندىلار ۇسىنعان ءابىش كەكىلبايدىڭ ەسەنعالي اقىن تۋرالى لەبىزى ەكراننان ەستىلدى. ولەڭ ولكەسىنە قادام باسقالى ەلدەن بولەك ەسەنعالي بوپ كەلگەن, ەجەلگى ءارى جاڭا تۇرپاتتى جىرلار تۋرالى كەمەڭگەر ءابىش اجەلەرىمىزدىڭ كەبەجەسىندەگى ءسۇردىڭ سارقىندىسىنداي دەپ بەينەلەپتى. اۆتوردىڭ «جاسقا جاس, ويعا كارى» سوققان تانىمى تەرەڭ جىرلارى توڭىرەگىندە مەملەكەتتىك سىيلىقتىڭ لاۋرەاتى, اقىن ۇلىقبەك ەسداۋلەت تە كەڭىرەك توقتالىپ, ەستەلىگىن قوساقتادى. ەساعاڭ اسكەردە جۇرگەنىندە-اق امانحان ءالىم باستاعان اقىندار ونىڭ ولەڭدەرىن داپتەرگە كوشىرىپ الىپ, ءوز ارالارىندا قۇمارى قانعانشا وقىپ تاراتىپ, اڭىزى ەرتە جەتكەن. ال «ەسەنعاليدىڭ الماتىعا كەلۋى» تۋرالى جىردىڭ كۇيىندەي اڭگىمە دە, ولەڭ دە جەتەرلىك. شەتەلدىك ساپارلارى تىپتەن شيىرلانىپ جاتىر.
ءسوز سويلەگەن ادامدا تولاس جوق, ارينە. ال اقىن جىرلارىن جەرىنە جەتكىزە وقىعان شاكىرت شايىرلارى ودان دا كوپ. اتاپ ايتقاندا, اقىندار ەرلان ءجۇنىس, باۋىرجان قاراعىز ۇلى, ەرعالي باقاش, جازۋشى بەيبىت سارىباي, تاعى ءبىر توپ تالانتتى جاس ەسەنعالي ولەڭدەرىن وقىسا, سوڭىنان ەرگەن اقىن باۋىرى قالقامان سارين ءسوز سويلەپ, جاناشىرلىعىن ەسكە الدى. مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتى كىتاپ ءىسى باسقارماسىنىڭ باسشىسى, جازۋشى الماز مىرزاحمەت اۆتوردىڭ كىتاپتارى بيىل التى مىڭ تيراجبەن ەلىمىزدىڭ بارلىق كىتاپحاناعا جەتەتىنىن مالىمدەدى.
ناعىز اقىن سوزدەرى بارا-بارا انگە اينالىپ كەتەدى دەگەن پىكىر راس, تەگى. ەساعاڭنىڭ كوپتەگەن ولەڭىنە ءان جازىلعان جانە شىرقالىپ جۇرگەنى بەلگىلى. ماسەلەن, «جولدانباعان حات» اتتى جىرىن انشىلەر ەكى ءتۇرلى نۇسقادا ورىندايدى. ءبىرى سالماقتى, ءبىرى جەڭىلدەۋ ىرعاقتا. ەسكە الۋ كەشىندە اقىن سوزىنە جازىلعان «جالعىز جيدە», «اق كويلەگىڭ ەتەگى بۇرمەلى ەدى» اندەرىن ايگۇل قۇماش, تابىلدى دوسىموۆ ءانىن جازعان «جولدانباعان حات» تۋىندىسىن ابىل اياش جانە تاعى دا باسقا شىعارمالارى ورىندالدى. جازۋشىلار وداعى ۇيىمداستىرعان ەسكە الۋ كەشى سوڭىندا اقىننىڭ اياۋلى جارى ناۋات اپامىز ءسوز سويلەپ, ەسەنعاليدىڭ تۋعان كۇنى – 5 قازاندى ەل كولەمىندەگى اقىندار تويىنا ۇلاستىرسا دەگەن پىكىرىن جۇپتادى.