ءداندى جانە ءداندى-بۇرشاقتى داقىلداردىڭ بولجامدى جيناۋ الاڭى 16 ملن گەكتاردان اسادى. بۇگىندە 13,3 ملن گەكتار نەمەسە جالپى ەگىس القاپتارىنىڭ 83%-ى جينالىپ, 20,8 ملن توننا استىق باستىرىلعان, دەپ حابارلايدى Egemen.kz.
ەل وڭىرلەرىندە جالعاسىپ جاتقان ەگىن جيناۋ ناۋقانى ۇيىمداسقان تۇردە, اگروتەحنيكالىق تالاپتارعا ساي مەرزىمدە ءوتىپ جاتىر.
اۋىل شارۋاشىلىعى مينيسترلىگىنىڭ مالىمەتىنشە ءداندى داقىلداردان بولەك, اۋىل شارۋاشىلىعى تاۋارىن وندىرۋشىلەر 1,4 ملن توننا مايلى داقىل, گەكتارىنا 228,2 تسەنتنەر ونىمدىلىكپەن 2,5 ملن توننا كارتوپ جانە گەكتارىنا 307,2 تسەنتنەر ونىمدىلىكپەن 3,5 ملن توننا كوكونىس جيناعان.
ناقتى اتاعاندا, 324,1 تس/گا ونىمدىلىكپەن 428,5 مىڭ توننا قىرىققابات, 441,0 تس/گا ونىمدىلىكپەن 1000,9 مىڭ توننا پياز, سونداي-اق 287,9 تس/گا ونىمدىلىكپەن 355,2 مىڭ توننا ءسابىز جينالىپ وتىر.