جۇمىسشى ماماندىقتار جىلى اياسىندا بۇگىن اقتاۋ قالاسىندا قازاقستاننىڭ باستاماسىمەن تۇڭعىش TurkicSkills حالىقارالىق كاسىبي شەبەرلىك چەمپيوناتىنىڭ اشىلۋ سالتاناتى ءوتتى - دەپ حابارلايدى وقۋ-اعارتۋ مينيسترلىگىنىڭ ءباسپاسوز قىزمەتى.
چەمپيوناتقا تۇركى مەملەكەتتەرىنەن كەلگەن تەحنيكالىق جانە كاسىپتىك ۇيىمدارىنىڭ ستۋدەنتتەرى, ساراپشىلار سالا وكىلدەرى قاتىسۋدا.
ءىس-شارانىڭ باستى ماقساتى — تەحنيكالىق جانە كاسىپتىك ءبىلىم بەرۋ جۇيەسىندە ۇزدىك تاجىريبەنى تاراتۋ, حالىقارالىق ىنتىماقتاستىقتى نىعايتۋ جانە جاستاردىڭ كاسىبي الەۋەتىن ارتتىرۋ.
چەمپيوناتتىڭ اشىلۋ سالتاناتىنا قر وقۋ-اعارتۋ ءبىرىنشى ۆيتسە-ءمينيسترى مايرا مەلدەبەكوۆا قاتىستى.
«مەملەكەت باسشىسى قاسىم-جومارت توقاەۆتىڭ 2025 جىلدى جۇمىسشى ماماندىقتار جىلى - دەپ جاريالاۋى — تەحنيكالىق جانە كاسىپتىك ءبىلىم بەرۋ جۇيەسىن جاڭعىرتۋدىڭ ماڭىزدى كەزەڭىنىڭ باستالۋى بولدى. TurkicSkills چەمپيوناتى — وسى جىلدىڭ باستى وقيعالارىنىڭ ءبىرى. بۇل الاڭ جاستاردىڭ كاسىبي شەبەرلىگىن كورسەتىپ قانا قويماي, تۇركى ەلدەرى اراسىنداعى ىنتىماقتاستىقتى, تاجىريبە الماسۋدى تەرەڭدەتەدى», — دەدى قر وقۋ-اعارتۋ ۆيتسە-ءمينيسترى مايرا مەلدەبەكوۆا.
چەمپيوناتقا 70-تەن استام ستۋدەنتتەر مەن جاس مامان جانە 90 ساراپشى قاتىسۋدا. ولار ينجەنەريا, اقپاراتتىق تەحنولوگيالار, ءوندىرىس, روبوتوتەحنيكا جانە قىزمەت كورسەتۋ سالالارى بويىنشا باق سىنايدى.TurkicSkills چەمپيوناتى 9 قازانعا دەيىن جالعاسادى.