ەلىمىزدە وقۋشىلارعا ارنالعان جاڭا تاماقتانۋ ستاندارتى ەنگىزىلدى

بۇل تۋرالى قر دەنساۋلىق ساقتاۋ مينيسترلىگىنىڭ سانيتارلىق-ەپيدەميولوگيالىق باقىلاۋ كوميتەتى توراعاسىنىڭ ورىنباسارى نۇرقان سادۋاقاسوۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ايتتى.

ونىڭ ايتۋىنشا, 2023 جىلدان باستاپ مەملەكەت باستاۋىش سىنىپ وقۋشىلارىن, سونداي-اق مەملەكەتتىك اتاۋلى الەۋمەتتىك كومەك الاتىن بالالاردىڭ جەكەلەگەن ساناتتارىن تەگىن ىستىق تاماقپەن قامتاماسىز ەتىپ كەلەدى.

«الايدا جۇرگىزىلگەن تالداۋ وقۋشىلاردىڭ اس مازىرىندە تۇز, قانت پەن ماي تىم كوپ, ال كوكونىس, جەمىس-جيدەك پەن ءسۇت ونىمدەرى جەتكىلىكسىز ەكەنىن كورسەتتى. مۇنداي تەڭگەرىمسىزدىك بالالار اراسىندا سەمىزدىك, قانت ديابەتى جانە جۇرەك-قان تامىرلارى اۋرۋلارىنىڭ ەرتە دامۋىنا ىقپال ەتەدى. وسى ماسەلەنىڭ اۋقىمىن ەسكەرە وتىرىپ, مەملەكەت سالاۋاتتى مەكتەپتىك تاماقتانۋدى باستى باسىمدىقتاردىڭ ءبىرى ەتتى. 2025 جىلعى 1 قىركۇيەكتەن باستاپ دەنساۋلىق ساقتاۋ ءمينيسترىنىڭ 2025 جىلعى 4 ناۋرىزداعى بۇيرىعىمەن بەكىتىلگەن جاڭا تاماقتانۋ ستاندارتى كۇشىنە ەندى», دەدى ن. سادۋاقاسوۆ.

جاڭا ستاندارت بارلىق ءبىلىم بەرۋ ۇيىمدارىنا: بالاباقشالارعا, مەكتەپتەرگە, كوللەدجدەرگە جانە ساۋىقتىرۋ لاگەرلەرىنە قولدانىلادى.

نەگىزگى وزگەرىستەر:

قانت مولشەرى 3,6 ەسە, ال تۇز مولشەرى 5 ەسە قىسقارادى;

كوكونىستەر, جەمىستەر مەن ءسۇت ونىمدەرىنىڭ ۇلەسى ارتادى;

مازىردەن شۇجىق ونىمدەرى, ىستالعان تاعامدار, سپرەدتەر جانە قانت پەن تۇزى جوعارى باسقا دا ونىمدەر الىنادى;

ءتاتتى سۋسىندار سۋدىڭ, ءسۇت پەن قىشقىل ءسۇت ونىمدەرىنىڭ, جەمىس شايلارى مەن قانت مولشەرى از كومپوتتاردىڭ پايداسىنا الىنىپ تاستالادى.

سونىمەن قاتار ستاندارتتا شاعىن جيناقتى مەكتەپتەردە تاماقتاندىرۋدى ۇيىمداستىرۋعا, ارنايى ديەتالىق قاجەتتىلىكتەرى بار بالالارعا تاماق بەرۋگە قاتىستى بولەك تالاپتار قاراستىرىلعان.