مەملەكەت باسشىسى قاسىم-جومارت توقاەۆ وقۋ-اعارتۋ ىسىندە ەلەۋلى ۇلەس قوسقان مۇعالىمدەردى كاسىبي مەرەكەسىمەن قۇتتىقتاپ, مەملەكەتتىك ناگرادالارمەن ماراپاتتادى. سونىڭ ىشىندە جەزقازعان قالاسىنداعى № 8 گيمنازيا مۇعالىمى كۇلزيرا قىدىرپاتشاەۆا دا بار, دەپ جازادى Egemen.kz.
قازاقتا «بىر ءارىپ ۇيرەتكەنگە قىرىق جىل سالەم بەر» دەيدى. ال ءۇزىلىسسىز قىرىق جىل ساباق بەرگەن ۇلاعاتتى ۇستاز ماڭگىلىك قۇرمەتتەلۋى ءتيىس. مىنە, پەداگوگيكا سالاسىندا 41 جىل قىزمەت ەتكەن كۇلزيرا ورزانبايقىزى مەملەكەت باسشىسىنىڭ قولىنان «ەرەن ەڭبەگى ۇشىن» مەدالىمەن ماراپاتتالدى.
كاسىبي باعىتى – بيولوگيا. كەيىنگى 15 جىل بەدەرىندە ديرەكتوردىڭ عىلىمي ادىستەمەلىك جۇمىس جونىندەگى ورىنباسارى قىزمەتىن اتقارىپ كەلەدى.
«ۇستاز بولۋ – ماماندىق قانا ەمەس, ول – ومىرلىك ۇستانىم. زاماناۋي ۇستاز ۇنەمى ىزدەنىستە جۇرەدى, جاڭالىققا اشىق, ءار بالانىڭ جۇرەگىنە جول تابا بىلەدى. بۇگىنگى مۇعالىم – تەك ءبىلىم بەرۋشى ەمەس, شاكىرتىنىڭ دوسى, باعىت بەرۋشىسى», دەيدى بىلىكتى ۇستاز.
تاجىريبەسى مول ماماننان جاس مۇعالىمدەرگە بەرەتىن كەڭەسىن سۇرادىق.
«ەڭ باستىسى – بالاعا دەگەن ماحاببات پەن سابىر. قاتەلىك جاساساڭىز – ول ءسىزدىڭ تاجىريبەڭىز, قورىقپاڭىز. ۇنەمى ىزدەنىپ, ءار وقۋشىنى تىڭداپ, سىيلاي ءبىلىڭىز. سوندا عانا ۇستازدىق جولىڭىز بەرەكەلى بولادى دەپ كەڭەس بەرەر ەدىم», دەيدى ك. قىدىرپاتشاەۆا.
سونىمەن قاتار ۇستازدىڭ ەڭ ۇلكەن ماراپاتى – شاكىرتىنىڭ جەتىستىگى ەكەنىن جەتكىزدى. ء«وز وقۋشىسىنىڭ تابىسىن كورگەندە ۇستاز ەڭبەگى اقتالادى. بۇل – كەز كەلگەن ماراپاتتان قىمبات».
ءيا, بۇگىنگى پارتاداعا وقۋشى – ەرتەڭگى اتپال ازامات. سوزىمىزگە پرەزيدەنت ءسوزى تياناق بولسىن. مارتەبەلى ماماندىق يەلەرىن قۇتتىقتاعان قاسىم-جومارت توقاەۆ ەلىمىزدە 2019 جىلدان بەرى قىلمىستىق قۇقىقبۇزىشىلىقتىڭ سانى ەكى ەسە قىسقارعانىن ايتتى. «قوعامدا جوعارى قۇقىقتىق مادەنيەت قالىپتاستىرۋدا وقۋ-اعارتۋ مينيسترلىگى مەن پەداگوگتەر ايرىقشا ءرول اتقارادى. سەبەبى ادىلدىك, زاڭ جانە ءتارتىپ قاعيداتتارى مەكتەپ پارتاسىنان باستاپ ورنىعۋى قاجەت», دەدى مەملەكەت باسشىسى.