بۇگىن استانا قالاسىنداعى ءۇندىستان ەلشىلىگى ماحاتما گانديدىڭ تۋعانىنا 156 جىل تولۋىن جانە بۇۇ جاريالاعان زورلىق-زومبىلىققا قارسى حالىقارالىق كۇندى ەسىل وزەنىنىڭ جاعاسىنداعى گاندي ەسكەرتكىشى جانىندا سالتاناتتى تۇردە اتاپ ءوتتى, دەپ حابارلايدى Egemen.kz.
ەڭ الدىمەن م.گاندي ەسكەرتكىشىنە گۇل شوقتارىن قويۋمەن باستالعان ءىس-شاراعا قازاقستان رەسپۋبليكاسىنداعى ءۇندىستان رەسپۋبليكاسىنىڭ ەلشىسى يا.ك. سايلاس تانگال, استانا قالاسى اكىمىنىڭ ورىنباسارى ەرىك مەيىرحان, قاسيەتتى تاقتىڭ ەلشىسى ارحيەپيسكوپ دجوردج پانامتحۋنديل, ۆەنەسۋەلانىڭ قازاقستانداعى ەلشىسى روزالبا لو بۋە انتيكو, بايقوڭىر اۋدانى اكىمىنىڭ ورىنباسارى ازامات مالىباەۆ, سونداي-اق ديپلوماتيالىق كورپۋس وكىلدەرى, باق وكىلدەرى, ءۇندى قاۋىمداستىعىنىڭ مۇشەلەرى, ءۇندى ستۋدەنتتەرى قاتىستى.
ەلشى سايلاس تانگال ماحاتما گانديدى بەيبىتشىلىك پەن زورلىق-زومبىلىقتان ادا الەمنىڭ جاقتاۋشىسى رەتىندە ەسكە الىپ, ونىڭ «مەنىڭ ءومىرىم – مەنىڭ جولداۋىم» دەگەن ءسوزىنىڭ ادامزاتقا باعىت-باعدار بولاتىنىن اتاپ ءوتتى. ول گانديدىڭ شىندىق, دىنارالىق كەلىسىم, تۇراقتى ءومىر ءسۇرۋ مەن جاناشىرلىق سياقتى قۇندىلىقتارى قازىرگى الەمدەگى قاقتىعىستار, تەڭسىزدىك جانە كليماتتىڭ وزگەرۋى سياقتى جاھاندىق سىن-قاتەرلەرمەن كۇرەسۋدە ەرەكشە وزەكتىلىگىن ايتتى.
ول قازاقستاندا دا ماحاتما گانديدىڭ مۇراسىن جوعارى باعالاپ, استانا مەن الماتى قالالارىندا ەسكەرتكىشتەر, ءال-فارابي اتىنداعى قازاق ۇلتتىق ۋنيۆەرسيتەتىندە ءۇندىستاندى زەرتتەۋ ورتالىعى, سونداي-اق الماتىدا ماحاتما گاندي مۇراجايى مەن مەكتەبى قۇرىلعانىن ايتتى. بۇلار ءۇندىستان مەن قازاقستان اراسىنداعى دوستىق پەن ورتاق قۇندىلىقتاردىڭ تەرەڭ بايلانىسىن كورسەتەدى.
ءىس-شارا بارىسىندا سۆامي ۆيۆەكاناندا مادەني ورتالىعىنىڭ (SVCC) قازاق ستۋدەنتتەرى مەن ۇندىستاندىق ستۋدەنت گانديدىڭ سۇيىكتى بحادجان اندەرىن ورىندادى.