بيىلعى قاراشادا World Boxing (WB) كونگرەسىندە اتالعان ۇيىمىنىڭ جاڭا پرەزيدەنتى سايلانادى. سول ءساتتى بارشا سپورت سۇيەر قاۋىم تاعاتسىزدانا كۇتىپ وتىر.
وسىعان دەيىن WB-نىڭ باسشىلىعىنا ۇمىتكەرلەر سانى ەكەۋ عانا ەدى. ولار – ەلىمىزدىڭ ايگىلى كاسىپقوي بوكسشىسى, ەڭ بەلدى نۇسقالار بويىنشا ورتا سالماقتاعى الەمنىڭ ەكس-چەمپيونى, ۇلتتىق وليمپيادا كوميتەتىنىڭ پرەزيدەنتى گەننادي گولوۆكين مەن گرەكيانىڭ بوكس قاۋىمداستىعىنىڭ جەتەكشىسى حاريس ماريوليس.
كۇنى كەشە تاعى ءبىر ۇمىتكەردىڭ ەسىمى بەلگىلى بولدى. ول – ۆلاديمير كليچكو. 49 جاستاعى ۋكراينانىڭ اتاقتى بوكسشىسى بىزگە بوتەن ەمەس, 1976 جىلى سەمەي وڭىرىندە دۇنيەگە كەلگەن. بالالىق شاعى سول جەردە ءوتتى. كەيىننەن وتباسى وزدەرىنىڭ تاريحي وتانىنا ورالدى. بوكسقا مىقتاپ دەن قويعان كليچكو اۋەسقويلار اراسىندا اتلانتا وليمپياداسىنىڭ (1996) جەڭىمپازى, ەۋروپا چەمپيوناتىنىڭ كۇمىس جۇلدەگەرى اتاندى.
1996 جىلدىڭ سوڭىندا ۆلاديمير كاسىپقوي رينگتەگى تۇساۋكەسەر كەزدەسۋىن وتكىزدى. 20 جىلدان اسا ۋاقىت ارالىعىندا بارلىعى 69 جەكپە-جەك وتكىزىپ, 64 رەت جەڭىسكە جەتتى, 54 قارسىلاسىن ەسىنەن تاندىردى. بەس مارتە ۇتىلىپ, تاعى ءبىر كەزدەسۋدىڭ ناتيجەسى ەسەپكە الىنبادى. ۋكراينانىڭ ءدۇلد ۇلى اسا اۋىر سالماقتا ۇزاق ۋاقىت بويى ەڭ بەلدى WBO (2000-2003, 2008-2015), IBF (2006-2015), IBO (2006-2015), WBO (2011-2015) نۇسقالارىنىڭ چەمپيوندىق بەلبەۋىنە يەلىك ەتتى. 2017 جىلى شاۋ تارتىپ قالعان شاعىندا لوندوندا ۇلىبريتانيانىڭ الىبى ەنتوني دجوشۋادان جەڭىلگەننەن كەيىن ۆلاديمير بىلعارى قولعابىن شەگەگە ءىلدى. ونىڭ تۋعان اعاسى ۆيتالي كليچكو دا كەزىندە الەمدەگى ەڭ بەلدى بوكسشىلار ساناتىندا بولدى. ول دا الەم چەمپيونى اتانىپ, سول اتاعىن سان مارتە ءساتتى قورعادى. قازىر ۆيتالي كليچكو كيەۆ قالاسىنىڭ مەرى قىزمەتىندە.
ۇمىتكەرلەر سانى وسىمەن شەكتەلىپ قالمايتىنى انىق. ويتكەنى ءوتىنىش قابىلداۋ مەرزىمى كونگرەسس باستالۋىنا تۋرا ءبىر اي قالعانعا دەيىن جاعاسادى. WB-نىڭ قازىرگى پرەزيدەنتى, نيدەرلاندىق فۋنكتسيونەر بوريس ۆان دەر ۆورست ەكىنشى مەرزىمگە سايلاۋعا تۇسۋدەن ءوز ەركىمەن باس تارتتى.