جامبىل وبلىسىنداعى ەگىنشىلىك پەن مال شارۋاشىلىعى سالاسى بىرقاتار جۇيەلى كەدەرگىلەرگە تاپ بولىپ وتىر. بۇل تۋرالى بۇگىن ءماجىلىستىڭ جالپى وتىرىسىندا دەپۋتات ە. ساۋرىقوۆ ايتتى, دەپ جازادى Egemen.kz.
«2023 جىلى قۋاڭشىلىق جاريالانىپ, توتەنشە جاعداي ەنگىزىلگەنىمەن, وتەماقى تەك سۋارمالى جەرلەرى بار شارۋاشىلىقتارعا عانا بەرىلدى.
ال ءتالىمى جەرمەن اينالىساتىن فەرمەرلەر ەشقانداي كومەك الا المادى.
بۇل – شارۋالارعا تيگەن العاشقى سوققى ەدى. 2024 جىلى ءونىم مول جينالعانىمەن, رەسەيدەن ارزان استىقتىڭ اعىلىپ كەلۋى سالدارىنان باعا كۇرت قۇلدىرادى.
وتاندىق ديحاندار ءوز ءونىمىن وتكىزە المادى. شىعىن جابىلمادى, تابىس تۇسپەدى. بۇعان قوسا, سۋبسيديا تولەمدەرى كەشىكتىرىلىپ, شارۋالاردىڭ جاعدايى ودان ءارى اۋىرلادى.
2025 جىلى قايتادان قۋاڭشىلىق قايتالاندى. تۇركىستان وبلىسىندا تابيعي سيپاتتاعى توتەنشە جاعداي جاريالانعانىمەن, جامبىل وبلىسىندا مۇنداي قادام جاسالمادى. سونىڭ سالدارىنان سۋبسيديا دا, ينۆەستيتسيالىق قولداۋ دا بەرىلمەدى. مىڭداعان شارۋاشىلىق قازىر بانكروت بولۋدىڭ الدىندا تۇر» , دەدى دەپۋتات.
ە. ساۋرىقوۆ وسىنداي كۇردەلى جاعدايعا قاراماستان اگرارلىق نەسيە كورپوراتسياسى تولىق تولەۋدى تالاپ ەتىپ وتىر.
«بۇل – ادىلەتسىز جاعداي دەپ ەسەپتەيمىز!
قازاگروقارجى دەرەگىنە سۇيەنسەك, اعىمداعى جىلدىڭ شىلدە ايىنىڭ وزىندە جامبىل وبلىسىندا 62 جوبانىڭ پروبلەمالىق بولىپ تىركەلگەنى انىقتالدى. قازىر كۇزدە بۇل كورسەتكىش ەكى ەسەگە ارتۋى مۇمكىن. دەمەك, جۇزدەگەن شارۋاشىلىقتىڭ تەحنيكاسى تاركىلەنىپ, جاپپاي بانكروتتىققا جول بەرىلەدى.
بۇل تەك شارۋالاردىڭ ەمەس, بۇكىل اۋىل حالقىنىڭ, مىڭداعان ادامنىڭ تاعدىرى», دەدى ە. ساۋرىقوۆ.
ماجىلىسمەن وسىعان قاتىستى 2024–2025 جىلدارعا ارنالعان سۋبسيديالار مەن ينۆەستيتسيالىق سۋبسيديالار بويىنشا بەرەشەكتەردى تولىق وتەۋدى قامتاماسىز ەتىپ, تولەم كەستەسىن ناقتى بەكىتىپ, ەلىمىزدىڭ وڭتۇستىك وڭىرلەرىنە ارنالعان جەكە مەملەكەتتىك باعدارلاما ازىرلەۋدى ۇسىندى. سونداي-اق كۇزگى دالا جۇمىستارىنا, تۇقىم مەن جانار-جاعارمايعا ارنالعان وڭىرلىك تۇراقتاندىرۋ قورى جاساقتاۋ قاجەت ەكەنىن اتاپ ءوتتى.