UEFA چەمپيوندار ليگاسى نەگىزگى كەزەڭىنىڭ ەكىنشى تۋرىندا قازاقستاندىق «قايرات» (الماتى) يسپانيالىق «رەال مادريد» (يسپانيا) كومانداسىن قابىلدادى, دەپ جازادى Egemen.kz.
الماتىنىڭ ورتالىق ستاديونىنداعى تاريحي ماتچ الاڭ يەلەرىنىڭ شابۋىلىمەن باستالدى. ءاپ دەگەننەن «قايرات» ويىنشىلارى قوناقتارعا قاۋىپ ءتوندىرىپ, كۋرتۋانىڭ قاقپاسىن تورۋىلداۋمەن بولدى. الايدا حابي الونسو جاتتىقتىراتىن فۋتبولشىلار دا قاراپ قالمادى. ورايى كەلگەندە شابۋىلعا شىعىپ, شەرحان قالمىرزانىڭ دا شەبەرلىگىن تەكسەرىپ كوردى.
كەزدەسۋدىڭ 25-مينۋتىندا «قايرات» كومانداسىنىڭ قاقپاسىنا پەنالتي بەلگىلەنىپ, ون ءبىر مەترلىكتەن ونىنشى نومىردەگى مباپپە گول سوقتى. وسىلايشا كورولدىك كلۋب ەسەپتە العا شىقتى. مۇنان سوڭ تابلوداعى ەسەپ ەكىنشى تايمدا وزگەردى. «رەالدىڭ» ۇزدىگى كيلليان 52-مينۋتتا دۋبل اۆتورى اتاندى. ويىننىڭ 58 مينۋتىندا مباپپەنىڭ تاماشا مۇمكىندىگى بولعان. الايدا قاقپا الدىندا بىلگەنىنەن جاڭىلدى. دەگەنمەن قىراعى شابۋىلشى 74-مينۋتتا حەت-تريك جاساپ, ەسەپتى ەسەلەي ءتۇستى.
قوناقتار مۇنىمەن توقتاپ قالمادى. كەزەكتى شابۋىلدارىنىڭ ءبىرىن كاماۆينگا گولعا اينالدىردى. فرانتسيالىق ويىنشى 83-مينۋتتا كەزدەسۋدەگى ءتورتىنشى گولدى ءوز اتىنا جازدى. ال, برايم دياس ويىننىڭ نۇكتەسىن قويدى.
وكىنىشكە قاراي, ورتالىق ستاديونداعى 22 788 جانكۇيەر جينالعان ويىندا الاڭ يەلەرى 0:5 ەسەبىمەن قارسىلاس كومانداعا جول بەردى.