ەلىمىزدە كەلەر جىلدان باستاپ ءوزىن-ءوزى جۇمىسپەن قامتىعاندارعا ارنالعان ارنايى سالىق رەجيمى ەنگىزىلەدى. بۇل تۋرالى قارجى مينيسترلىگى مەملەكەتتىك كىرىستەر كوميتەتى حابارلادى, دەپ جازادى Egemen.kz.
جاڭا ەرەجەگە سايكەس, ينتەرنەت-پلاتفورمالار ارقىلى قىزمەت كورسەتەتىن تاكسيستەر مەن كۋرەرلەردىڭ سالىقتارى مەن الەۋمەتتىك تولەمدەرىن ەندى سول پلاتفورمالاردىڭ وزدەرى اۋدارادى. ياعني, ياندەكس Go, Glovo سياقتى سەرۆيستەر ورىنداۋشىلاردىڭ تابىسىنان 4%-ىن ۇستاپ قالىپ, بيۋدجەتكە جىبەرىپ وتىرادى.
مەملەكەتتىك كىرىستەر كوميتەتىنىڭ تۇسىندىرۋىنشە, بۇل جۇيە سالىق تولەۋشىلەردى ەسەپ جۇرگىزۋدەن, چەك بەرۋدەن, ەسەپ تاپسىرۋدان بوساتادى. بارلىق ۇدەرىس اۆتوماتتاندىرىلادى.
«قولدانىستاعى كودەكستە ولار جەكە كاسىپكەر رەتىندە 3% تولەيدى نەمەسە جالدامالى جۇمىسشى بولسا 10%, وعان قوسا الەۋمەتتىك جارنالار, زەينەتاقى اۋدارىمدارى بار. ال جاڭا كودەكستە بارلىعى 4% عانا – ءار باعىتقا 1%-دان. بۇل ەڭ تومەنگى مولشەرلەمە ءارى اشىق جۇمىس ىستەۋگە مۇمكىندىك بەرەدى», دەدى مەملەكەتتىك كىرىستەر كوميتەتىنىڭ باسقارما باسشىسى ەرقانات شىنبەرگەن.
جاڭا ءتارتىپ بويىنشا تابىستىڭ 4%-ى الەۋمەتتىك تولەمدەرگە بولىنەدى: بىرىڭعاي جيناقتاۋشى زەينەتاقى قورىنا, الەۋمەتتىك ساقتاندىرۋ قورىنا, الەۋمەتتىك اۋدارىمدارعا, مىندەتتى الەۋمەتتىك مەديتسينالىق ساقتاندىرۋعا. سونىمەن قاتار جالدامالى جۇمىس كۇشىن پايدالانۋعا تىيىم سالىنادى, ايلىق تابىس 300 ايلىق ەسەپتىك كورسەتكىشتەن اسپاۋى ءتيىس (2026 جىلى شامامەن 1,3 ملن تەڭگە), ءارى جەكە كاسىپكەر رەتىندە تىركەلمەۋ قاجەت.