الماتى قالاسىنداعى 28 پانفيلوۆشى ساياباعىندا م. ەسبولاتوۆ اتىنداعى الماتى اكادەمياسىنىڭ ءبىرىنشى كۋرس كۋرسانتتارى انت قابىلداۋ ءراسىمىن سالتاناتتى تۇردە وتكىزدى, دەپ حابارلايدى Egemen.kz.
بيىلعى شارا ەرەكشە فورماتتا ۇيىمداستىرىلىپ, ەكى ايتۋلى داتاعا ارنالدى – رەسپۋبليكا كۇنىنە 35 جىل جانە ۇلى جەڭىستىڭ 80 جىلدىعى. وتەتىن ورىن دا سيمۆولدىق مانگە يە: پانفيلوۆشىلار ساياباعى – تاريح پەن تاعزىمعا تولى قاسيەتتى مەكەن, ۇرپاقتار ساباقتاستىعىن سەزىندىرەتىن, وتانسۇيگىشتىك رۋحىن دارىتاتىن ورىن.
سالتاناتقا ىشكى ىستەر ورگاندارىنىڭ ارداگەرلەرى, قۇرمەتتى قوناقتار, ءىىم باسشىلىعى, كۋرسانتتاردىڭ اتا-انالارى جانە گونكونگ پوليتسيا اكادەمياسىنان ارنايى دەلەگاتسيا قاتىستى.
«بۇگىن ءبىزدىڭ جاس كۋرسانتتار ومىرىندەگى ەڭ العاشقى ءارى ماڭىزدى قادامدى جاساپ وتىر – ولار انت قابىلدادى. حالىققا ادال قىزمەت ەتۋگە, زاڭدى قاستەرلەۋگە جانە وفيتسەر ابىرويىن ساقتاۋعا سەرت بەردى. بۇل وقيعانىڭ ءدال وسى جىلى, وسى جەردە ءوتۋى ءبىز ءۇشىن اسا ماڭىزدى. رەسپۋبليكا كۇنى مەن جەڭىس مەرەيتويى تاۋەلسىزدىكتىڭ باعاسىن, وتانعا قىزمەت ەتۋدىڭ ۇلكەن جاۋاپكەرشىلىك ەكەنىن ەسكە سالادى», دەپ اتاپ ءوتتى قازاقستان رەسپۋبليكاسى ءىىم ماقان ەسبولاتوۆ اتىنداعى الماتى اكادەمياسىنىڭ باستىعى, پوليتسيا پولكوۆنيگى قاليجان قوبلاندين.
اتا-انالار ءۇشىن دە بۇل كۇن ەرەكشە تولقىنىس پەن ماقتانىشقا تولى ءسات بولدى.
«بۇل كۇندى ءبىز كوپ كۇتتىك. ءبىز ءۇشىن بۇل بالالارىمىزدىڭ ەسەيىپ, ماڭىزدى شەشىم قابىلداعانىنىڭ ايعاعى. ەندى ولار ەلگە قىزمەت ەتۋگە دايىن. بۇگىن ولاردى جيناقى, سىمباتتى, وزىنە سەنىمدى كورىپ, جۇرەگىمىزدى ماقتانىش سەزىمى كەرنەيدى», دەدى اتا-انالاردىڭ ءبىرى.
جاس كۋرسانتتار بۇل كۇنگە ۇزاق دايىندالدى. بۇگىن ولار ساپ تۇزەپ, پارادتىق كيىمدە, جيناقى دا ءتارتىپتى بولىپ, اكادەميا قاتارىن تولىقتىرىپ, وفيتسەرلىك جولعا العاشقى قادام باستى.