مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي قىزىلوردا وبلىسىنداعى جۇمىس ساپارى اياسىندا مەملەكەتتىك قىزمەتشىلەرمەن جانە جاستارمەن كەزدەستى.
وبلىس اكتيۆىمەن كەزدەسۋدە اگەنتتىك توراعاسى مەملەكەت باسشىسىنىڭ تاپسىرماسىنا سايكەس ادامعا باعدارلانعان سەرۆيستىك مەملەكەتتىك اپپاراتتى قالىپتاستىرۋ باعىتىندا ىسكە اسىرىلىپ جاتقان شارالارعا توقتالدى.
كەزدەسۋ بارىسىندا مەملەكەتتىك كورسەتىلەتىن قىزمەتتى الۋشىلاردىڭ قۇقىقتارىن قورعاۋ, مەملەكەتتىك اپپاراتتى بيۋروكراتيادان ارىلتۋ, كادرلىق پروتسەستەردى تسيفرلاندىرۋ, مەملەكەتتىك قىزمەتكە كىرۋ ءتارتىبىن وڭتايلاندىرۋ جانە سىبايلاس جەمقورلىققا ىقپال ەتەتىن سەبەپتەر مەن جاعدايلاردىڭ الدىن الۋ ماسەلەلەرى ايتىلدى.
دارحان جازىقباي ءوز سوزىندە «ادال ازاماتقا» ءتان بارلىق قۇندىلىقتار ەڭ الدىمەن مەملەكەتتىك قىزمەتشىلەردىڭ تۇلعالىق بولمىسىنان كورىنىس تاۋىپ جاتسا مەملەكەتتىك اپپاراتتىڭ جۇمىسىنا تىڭ سەرپىن بەرەرى انىق. ادالدىق, ادىلدىك پرينتسيپتەرىن مەملەكەتتىك اپپاراتتىڭ جۇمىسىندا جان-جاقتى ىلگەرىلەتۋ – حالىققا شىنايى, ادال, اشىق قىزمەت كورسەتەتىن مەملەكەتتىك اپپارات قالىپتاستىرۋدا شەشۋشى ءرول اتقارادى» - دەپ اتاپ ءوتتى.
ءىس-ساپار اياسىندا اگەنتتىك توراعاسى ەلگە ادال قىزمەت ەتۋدى ومىرلىك ۇستانىمى ەتكەن, ءبىلىمدى ءارى ەڭبەكقور جاستارمەن – پرەزيدەنتتىك جاستار كادر رەزەرۆى مەن وڭىرلىك كادر رەزەرۆىنىڭ وكىلدەرىمەن كەزدەستى. كەزدەسۋدە ول «سىزدەردەن وبلىس حالقى ءوڭىردىڭ وزەكتى ماسەلەلەرىن شەشۋدە كرەاتيۆتىلىك پەن جاڭا تاسىلدەردى كۇتەدى, يدەيالارىڭىز بەن جوبالارىڭىز ۇلكەن وزگەرىستەرگە نەگىز بولادى, ءومىر ساپاسىن ودان ءارى جاقسارتادى دەپ سەنەدى. وسى ورايدا حالىقتىڭ سەنىمىن اقتاۋ قاجەت» دەگەن پىكىرىن اتاپ ءوتىپ, رەزەرۆ مۇشەلەرىنىڭ تەك بىلىممەن عانا ەمەس, جوعارى ادامگەرشىلىك قۇندىلىقتاردى دا بويىنا ءسىڭىرۋى قاجەت ەكەنىن العا تارتتى.
سونىمەن قاتار, دارحان جازىقباي قورقىت اتا ۋنيۆەرسيتەتىنىڭ ستۋدەنتتەرى جانە جاس مەملەكەتتىك قىزمەتشى مەكتەبىنىڭ تىڭداۋشىلارىمەن كەزدەسىپ, جاستارعا ارنالعان مەملەكەتتىك قىزمەتتەگى مۇمكىندىكتەر جايلى ايتتى.
بۇگىندە ەلىمىزدە مەملەكەتتىك قىزمەتكە كىرۋدى بارىنشا جەڭىلدەتۋ بويىنشا قابىلدانعان شارالار ناتيجەسىندە جوعارى وقۋ ورنىن جاقسى كورسەتكىشپەن (GPA 3,33-تەن كەم ەمەس) بىتىرگەن 588 تۇلەك اۋداندىق جانە اۋىلدىق جەرلەردەگى تومەنگى لاۋازىمدارعا كونكۋرسسىز قابىلدانىپ, قىزمەت اتقارۋدا. ولاردىڭ 20-سى وسى قىزىلوردا وبلىسىندا مەملەكەتتىك قىزمەتكە ورنالاسقان.
كەزدەسۋگە قاتىسۋشىلار جاستاردى قولداۋعا باعىتتالعان جوبالارعا جانە جاڭاشىلدىقتارعا قىزىعۋشىلىق تانىتىپ, وزدەرىن قىزىقتىرعان سۇراقتارىن ورتاعا سالدى.
اگەنتتىك توراعاسى قىزىلوردا وبلىسىنداعى ءىس-ساپارىنىڭ سوڭىندا جەرگىلىكتى «QYZYLORDA» تەلەارناسىنىڭ «Elgeqyzmet» باعدارلاماسىنا مەملەكەتتىك قىزمەتتى دامىتۋدىڭ الداعى جوسپارلارى تۋرالى سۇحبات بەردى.