قازاقستاندا تەحنيكالىق جانە كاسىپتىك ءبىلىم بەرۋ ۇيىمدارىنىڭ تيىمدىلىگىن ارتتىرۋعا باعىتتالعان كەڭ اۋقىمدى رەفورما باستالدى, دەپ حابارلايدى Egemen.kz وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەمە جاساپ.
مينيسترلىكتىڭ مالىمەتىنشە, العاشقى 30 كوللەدج كورپوراتيۆتىك باسقارۋ جۇيەسىنە كوشۋدە. جاڭا ءتاسىل وقۋ ورىندارىنىڭ باسقارۋ مودەلىن جەتىلدىرىپ, اشىقتىق پەن تيىمدىلىكتى قامتاماسىز ەتۋدى كوزدەيدى.
سونىمەن قاتار كوللەدجدەردىڭ قارجىلىق دەربەستىگىن كەڭەيتۋ باعىتىندا دا ماڭىزدى قادامدار جاسالۋدا. جان باسىنا شاققانداعى قارجىلاندىرۋدىڭ ديففەرەنتسيالدى ادىستەمەسى ەنگىزىلىپ, 2025–2026 وقۋ جىلىندا ءبىر ستۋدەنتكە بولىنەتىن قارجى كولەمى ورتاشا ەسەپپەن 437 مىڭ تەڭگەدەن 912 مىڭ تەڭگەگە دەيىن ارتتىرىلدى. كوللەدجدەر ءتورت ليگاعا ءبولىنىپ, ارنايى اقپاراتتىق جۇيە ارقىلى اۆتوماتتى تۇردە باعالانادى. ءار ليگاعا باسقارۋ, ىنتالاندىرۋ جانە قولداۋ بويىنشا ديففەرەنتسيالدى تاسىلدەر قولدانىلادى.
كادرلىق الەۋەتتى ارتتىرۋ دا رەفورما اياسىنداعى نەگىزگى باسىمدىقتاردىڭ ءبىرى. ء«بىلىم بەرۋدەگى وزگەرىستەردىڭ 1000 كوشباسشىسى» جوباسى بويىنشا 50 كوللەدج ديرەكتورى كاسىبي وقىتۋدان ءوتىپ, جاڭا بۋىن باسشىلارىنىڭ پۋلى قالىپتاستىرىلدى. 2025 جىلى 5770 پەداگوگ بىلىكتىلىكتى ارتتىرۋ كۋرستارىنان وتۋدە. ونىڭ ىشىندە 2000-ى ءوندىرىس ورىندارىندا تاجىريبەدەن وتەدى. سونىمەن بىرگە پەداگوگتاردىڭ قۇزىرەتتەرىن سەرتيفيكاتتاۋ جۇيەسى ەنگىزىلىپ, 2027 جىلدىڭ سوڭىنا دەيىن شامامەن 10 000 پەداگوگتى دايارلاۋ جانە سەرتيفيكاتتاۋ جوسپارلانعان.
جاڭا باستامالاردىڭ ءبىرى – پەداگوگتارعا ارنالعان وندىرىستىك پراكتيكا مەن تالىمگەرلىك جۇيەسىنىڭ ەنگىزىلۋى. وقىتۋشىلار جەتەكشى كاسىپورىنداردىڭ وندىرىستىك الاڭدارىنا جىبەرىلىپ, سالانىڭ جاڭا تەحنولوگيالارى مەن تالاپتارىمەن تانىسادى. تاجىريبەلى ءوندىرىس شەبەرلەرى مەن جەتەكشى وقىتۋشىلار جاس پەداگوگتارعا تالىمگەرلىك ەتەدى. بۇل شارالار كوللەدجدەردە تاجىريبەگە باعىتتالعان وقىتۋدى دامىتۋعا, زاماناۋي ەكونوميكانىڭ سۇرانىسىنا ساي جاڭا بۋىن كادرلاردى دايارلاۋعا جول اشادى.