ەلىمىزدەگى جەتەكشى ۇيالى بايلانىس وپەراتورى كسەll 2025 جىلدىڭ باسىنان بەرى اۋىلدىق ەلدى مەكەندەردە 4G جەلىسىن كەڭەيتۋ جۇمىستارىن قارقىندى جۇرگىزىپ كەلەدى. وسى جىلدىڭ وزىندە ەلىمىزدە بارلىعى 712 اۋىلدا جوعارى جىلدامدىقتى 4G ۇيالى ينتەرنەت قولجەتىمدى بولدى. سونىڭ ىشىندە 243 – تۇركىستان (78), قىزىلوردا (38), ماڭعىستاۋ (36), اقتوبە (25), اتىراۋ (20) جانە وزگە وڭىرلەردەگى اۋىلداردا العاش رەت 4G بازالىق ستانتسيالارى ورناتىلىپ, مىڭداعان تۇرعىن تۇراقتى ءارى ساپالى بايلانىسپەن قامتىلدى, دەپ حابارلايدى Egemen.kz.
بۇل جۇمىس شالعايداعى اۋىلداردىڭ تسيفرلىق ينفراقۇرىلىمىن نىعايتىپ, ەلدى مەكەندەردىڭ الەۋمەتتىك-ەكونوميكالىق دامۋىنا تىڭ سەرپىن بەرەدى. ايتا كەتەرلىگى, كسەلل كومپانياسى ورناتىپ جاتقان بازالىق ستانتسيالارىنىڭ 75%-دان استامى ءدال وسى 4G جەلىسىنە تيەسىلى.
ەڭ ماڭىزدىسى, اتالعان اۋىلداردىڭ 59-ى «250+» جوباسى اياسىندا بايلانىسپەن قامتاماسىز ەتىلدى. «250+» جوباسىنىڭ نەگىزگى ماقساتى — حالقى 250 ادامنان اساتىن شاعىن ەلدى مەكەندەرگە جىلدام ءارى تۇراقتى ۇيالى بايلانىس ورناتۋ. بۇل جوبا اۋىل مەن قالا اراسىنداعى تسيفرلىق الشاقتىقتى ازايتىپ, اۋىل تۇرعىندارىنىڭ الەۋەتىن تولىق اشۋعا مۇمكىندىك بەرەدى. جاڭا 4G بايلانىسى ارقىلى اۋىل تۇرعىندارى تەلەمەديتسينا, قاشىقتان ءبىلىم الۋ, ەلەكتروندى مەملەكەتتىك قىزمەتتەر مەن كاسىپكەرلىك سالاسىندا ءتيىمدى ءارى قولجەتىمدى مۇمكىندىكتەرگە يە بولادى.
«كسەلل ينتەرنەتتىڭ جىلدامدىعى مەن ساپاسىن ارتتىرۋعا تۇراقتى ينۆەستيتسيا قۇيىپ وتىر. تەك 2023–2024 جىلدارى عانا 255 ميلليارد تەڭگەدەن استام قاراجات ءبولىندى. ءاربىر جاڭا بازالىق ستانتسيا – بۇل اۋىل تۇرعىندارىنا جاڭا مۇمكىندىكتەرگە اشىلعان ەسىك. ءبىزدىڭ باستى ماقساتىمىز – اۋىل مەن قالا اراسىنداعى تسيفرلىق تەڭدىكتى قامتاماسىز ەتۋ», دەيدى «كسەلل» اق باسقارما توراعاسى اسقار جامباكين.
بۇل باعىتتاعى جۇمىستىڭ ناتيجەسى اۋىلدارداعى ينتەرنەت ترافيگىنىڭ ەداۋىر وسۋىندە بايقالادى. مىسالى, 2025 جىلدىڭ العاشقى جارتىجىلدىعىندا كسەلل جەلىسىندەگى ينتەرنەت ترافيگى 630 پەتابايتقا جەتىپ, وتكەن جىلمەن سالىستىرعاندا 67% ءوستى. بۇل كورسەتكىشتەر جەلى ساپاسىنىڭ جاقسارعانىن عانا ەمەس, سونىمەن قاتار اۋىل حالقىنىڭ تسيفرلىق تەحنولوگيالاردى بەلسەندى تۇردە قولدانا باستاعانىن دالەلدەيدى.
«250+» جوباسى – تەك بايلانىس ساپاسىن جاقسارتۋ ەمەس, اۋىلدىق جەرلەردىڭ ءومىر ءسۇرۋ دەڭگەيىن جاڭا دەڭگەيگە كوتەرۋگە باعىتتالعان اۋقىمدى الەۋمەتتىك باستاما. بۇل جوبا ەلىمىزدىڭ تسيفرلىق دامۋ ستراتەگياسىنىڭ ماڭىزدى بولىگى رەتىندە ەلىمىزدىڭ بارلىق ايماقتارىندا تەڭ مۇمكىندىكتەردى قالىپتاستىرۋعا ۇلەس قوسادى.